Señor Marcelino Mauricio, Zorgmanager di Stichting HUNTO
*Un sistema rotativo di cuido cu tin solamente na Aruba
ORANJESTAD (AAN) – Segun señor Marcelino Mauricio, Zorgmanager di Stichting Hunto, e sistema cu Aruba tin pa cubri tur e facetanan di adiccion ta un paso importante pa logra un maneho mas efectivo den cuido y apoyo pa adictonan. Mauricio a señala cu e estructura actual ta crea un tipo di “efecto carousel” – un sistema rotativo di cuido – cu, segun e, no ta comun ni sikiera na Hulanda.
Un adicto ta generalmente cuminsa su trayecto for di Bemoeizorg. For di ey, e ta pasa pa e Inloophuis, cu ta un punto di entrada accesibel. Desde e Inloophuis, e por wordo referi pa cuido Intramural na Sero Colorado, y eventualmente pasa pa cuido na Stichting Hunto, unda un ekipo profesional ta traha pa integra e adicto bek den comunidad. Tur esaki ta forma parti di un sistema encadena, un "carousel completo", manera señor Mauricio a yam’e, pa sigui y guia un adicto durante su proceso di recuperacion.
Mas importante, segun Mauricio, ta cu e mesun cliente ta keda den contacto continuo cu e mesun grupo di cuido. Esaki ta crea stabilidad y continuidad den su trayecto di recuperacion y integracion.
Señor Mauricio a remarca cu e efecto carousel aki pa atende adictonan solamente tin na Aruba, unda cu e adicto ta keda bou di un solo dak, den contacto cu e mesun profesionalnan, sin cu su cuido wordo interumpi entre diferente instancianan.
