Grislynn Hernandez, director:
ORANJESTAD (AAN) – Señora Grislynn Hernandez, Directora di Fundacion VeneAruba Solidaria, den conferencia di prensa yama pa Consulado di Colombia, den cuadro di e programa di Gobierno, di regulacion di e Imigrantenan indocumenta na Aruba, a hiba palabra.
El a gradici e Canciyeria di Colombia y e Consul Serrano, pa permiti Fundacion VeneAruba ta parti di e proceso aki, cu pa e Fundacion y pa e Imigrantenan ta hopi importante. El a indica cu nan tabata presente den nomber di Canciyeria di Colombia, Consulado di Colombia y ACNUR, pasobra na e momentonan aki nan a uni pa yuda den e proceso di trayecto 4.
“Con nos ta bay yuda? Pa ora tur e personanan cu ora nan yega DIMAS nan tin tur documento verifica y cu e proceso sea hopi facil y super lihe. Mi ta bisa esaki pasobra tin hopi hende cu ta yegando, ta ocupando e citanan pero ora nan yega ta pa puntra mientras cu den hopi oportunidad a wordo bisa, y pasa den videonan, tur e rekisitonan. Boso por bin cerca nos. Pesey nos t’ey.
E ta completamente gratis, nos t’ey for di 8’or di mainta te atardi 5.30’or, na Fundacion VeneAruba Solidaria. Nos ta no solamente yudando na orienta, pero tambe pa yena e carta cu ta wordo exigi di Declaracion Hura.
Si bo no sa yen’e por bin cerca nos, nos ta yuda bo. Si bo no tin un curriculum, cu tambe ta un di e rekisitonan, tambe nos ta yudando completamente gratis.
Tambe nos ta obtene e cita, ta arma henter e folder pa ora bo yega aya, ya bo ta listo sin haya un negacion. Si bo no ta optando pa e permiso aki en special, no mester ta den e proceso 1,2,3 cual tambe nos ta apoyando, y ta esnan cu tin e garante.
Di berdad ta un oportunidad unico cu ta wordo presenta na tur e comunidad imigrante y aki nos ta, e tres institucionnan p’apoya boso na e momento aki, no bay keda pafo. Nos ta ubica na Italiastraat 24 A- parti ariba, Unit 5. Nos no ta duna cita, e ta bay pa ordo di yegada”, señora Hernandez a señala.
