ORANJESTAD (AAN): E siman aki, e compania Carnival Cruise Line a duna informacion di nan plannan pa uza barconan nobo,
re-posiciona nan home-port, y a anuncia cu tres crusero grandi lo bay cuminza na viahenan pa y for di Florida.
Carnival Cruise Line ta mudando e barco Carnival Venezia pa Port of Miami, pa asina na aña 2027 cuminza cu viahenan di sea 6-dia y tambe di 8-dia pa Caribe. Ademas nan lo bay expande mas viahe tambe cu e barconan Carnival Magic, y tambe Carnival Vista.
Encuanto e barco Carnival Venezia, esaki ta un barco di clase ‘Vista’, cu originalmente a wordo diseña pa sirbi mercado di viaheronan na China. El a debuta como ‘Costa Venezia’ na Shanghai dia 18 di Mei 2019. E tin capacidad pa 4.208 pasahero, y na aña 2023 e barco a wordo transferi pa Carnival, bao di un sub-marca yama ‘Costa as Carnival’, y a cuminza opera bao di e lema di ‘Carnival Fun Italian Style’. Na Maart 2023 el a cambia su nomber oficialmente pa Carnival Venezia.
Carnival Venezia lo muda pa Miami na luna di Mei 2027 ofreciendo viahenan pa Caribe. E viahenan di 6-dia lo bay ta pa parti west di Caribe, bishitando un destinacion nobo y exclusivo di Carnival yama ‘Celebration Key’ na Bahamas. Tambe lo bishita wafnan popular manera Ocho Rios of Montego Bay na Jamaica, Grand Cayman, Grand Turk y Amber Cove (Rep. Dominicana).
E viahenan di 8-dia lo inclui viahe pa zuid di Caribe, bishitando Aruba, Bonaire, Curaçao, y tambe Amber Cove (Rep. Dominicana.)
