ORANJESTAD (AAN): Diabierna atardi, Formador Evelyn Evelyn Wever-Croes hunto cu Ursell Arends, lider di Partido RAIZ a bini hunto pa asina reitera e anuncio cu a keda haci pa Gobernador Boekhoudt relaciona cu e hecho cu e acuerdo di gobernacion definitivo a keda entrega oficialmente.
Wever-Croes, den corto, a confirma cu a haci entrega na Gobernador di e acuerdo aki y a laga sa cu dos luna pasa tabata tin eleccion y despues di esey el a wordo punta como Formador y a cuminsa di biaha cu tur e tareanan.
E prome paso tabata un acuerdo di intencion cu a firma na Faro y a base di esey a sigui den negociacion pa yega na forma un gobierno stabil cu ta conta cu mayoria den Parlamento. A firma un acuerdo di gobernacion siman pasa y diabierna a entrega esaki oficialmente na Gobernador, a bisa.
Tambe a entrega na Gobernador un reparticion di carteranan entre MEP y RAIZ cu ta e di dos paso. E di tres paso cu falta ainda ta e parti di aprobacion di candidatonan pa Minister. Esey ta andando ainda, a remarca.
Segun Wever-Croes, lo keda na 8 ministerio manera tabata na Gabinete Wever-Croes I di cual RAIZ ta haya 2 ministerio y MEP 6. (Riba Front Page por wak e carteranan).
Un di e ministerionan cu no a menciona ta Energia y Turismo. Esakinan ta cay bao di MEP. E motibo cu nan no ta hinca den e titulo ainda ta pasobra cu ningun di nan dos tin un departamento di gobierno, pero si nan ta bay resorta bao di un minister. Tampoco a menciona Agricultura-Sector Primario ni tampoco e tereno di desperdicio. E dosnan aki ta bay cay bao responsabilidad di RAIZ.
Ta finalisando e reparticion di tur e diferente departamentonan y institutonan unda tambe ta bay haya algun cambio.
A entrega tambe na Gobernador den cuadro di screening tur e documentacionnan cu tin pas asina gobernador por haci evaluacion y pa por sigui delibera tocante e resultado, Formador Wever-Croes a indica.
E proceso aki lo finalisa den e huramentacion di e ministernan.
Evelyn Wever-Croes a gradici RAIZ pa e forma con nan ta bin deliberando riba e parti di formacion.
Na otro banda, Ursell Arends a expresa cu nan tambe ta sinti cu tin un bon 'gevoel' y cu nan ta hopi contento y satisfecho cu e reparticion di cartera. "Esaki ta netamente loke RAIZ tabata kier y loke nos a pidi y nos a haya tur e cooperacion di Min Pres como Formador pa asina aki facilita pa nos por a haya e carteranan aki".
Wever-Croes a remarca cu e nombernan di e candidato pa minister no ta conoci ainda ya cu ta pendiente di e proceso di screening.
E fecha di instalacion oficial di gobierno esey no ta conoci ainda.
