ORANJESTAD (AAN) – Fundacion Refugio Aruba a reuni cu Formador Evelyn Wever-Croes, den e cuadro di reunionnan cu stakeholders externo, den e proceso di formacion di Gabinete Wever-Croes 2.
Señora Fejite Zijlstra, director di e fundacion, den conferencia di prensa despues di e reunion cu Formador, a keda satisfecho cu un combersacion hopi ameno cu Formador.
Zijlstra a duna di conoce cu Formador a haya mas claridad riba kico ta Refugio Social, y e speranza cu e fundacion tin, ta cu si tur cos cana bon, pa April otro aña Refugio Social ta bira e realidad mes.
E fundacion tin e edificio, pero nan ta wardando riba e permiso di construccion y e aprobacion di DOW, pa nan por start sali pa sigui cu e renovacion di e cas cu ta existi caba, y dentro di cien dia e trabao ey lo keda cla pa e fundacion cumpli cu crisis opvang, si ta necesario.
Fejite a menciona cu Fundacion Refugio Social lo ta e prome “mannenopvang” den nos region. Nan ta bay traha den cooperacion cu señora Jeannette Richardson-Baars, di “mesenhandel- mesensmokkel”, unda tambe Fundacion Refugio Social por duna opvang, vooral na hende homber cu ta cay den mesenhandel-mesensmokkel.
Zijlstra a señala cu e fundacion no ta bay guia caso, pero ta bay traha conhuntamente cu e instancianan cu ta bay trece hende pa nan. Por ehemplo, si Departamento di Asunto Social tin cliente cu mester di crisis opvang, DAS ta guie, pero Fundacion Refugio ta dune opvang na prome instancia.
Mescos cu den e caso di mesenhandel-mesensmokkel e instancia ta duna e guia y Fundacion Refugio Social ta duna e servicio, manera un hospitalidad. Nan tin un cushina cu e personanan cu mester por uza, pero e mester wordo adapta. E mester bira un cushina social, por ehemplo tin adultonan mayor cu mester di un cuminda cayente tur dia, nan kier ofrece e servicio unda nan por cumpra pa un prijs hopi abao, un cuminda saludable. Esey e fundacion kier bay traha, hunto cu scolnan manera EPB y Colegio EPI, cu ta duna e parti di HORECA. Y tambe, e fundacion kier yuda e drop outs cu direccion di cushina, pa via di Refugio Social desaroya nan habilidadnan pa nan tambe sigui dilanti.
Ampliando riba e vision y mision di Fundacion Refugio Social, señora Fejite Zijlstra a bisa cu esaki ta duna opvang na personanan cu vooral den crisis, mester di un dak riba nan cabes.
Tin hopi hende homber cu, podise, door di un problema relacional na cas no tin lugar pe na e momento ey, anto e instancia por manda e persona ey cerca Refugio Social, per e instancia mes lo sigui guie.
El a agrega cu di mesenhandel-mesensmokkel, tabata tin como 13 caso, pero como cu no tin con pa opvang e hendenan aki, no por a sigui cu e onderzoek. El a agrega cu cada bez Aruba ta keda un tiki negativo riba e parti aki, pasobra no tin e opvang, pero cu e speranza cu lo tin e opvang aki, lo por bay traha riba e problematica aki. Zijlstra a bisa.
Den e parti patras di e cas tin capacidad pa acoge 16 persona, y tin e posibilidad di keda hospeda 30 dia den casonan di crisis opvang. El a splica cu antes Cruz Cora y DAS tabata wak pa nan durante 72 ora, pero nunca lo por logra duna un yudanza corecto, den un lapso asina.
