E di dos localidad di ‘Tienda Legal Laboral’ a habri awor tambe na MFA Paradera

ORANJESTAD (AAN): Dialuna 25 di mei 2026, Directie Arbeid en Onderzoek (DAO) ta anuncia cu ‘Tienda Legal Laboral’ (TLL) a habri su di dos localidad na MFA Paradera.

E soft opening di e proyecto piloto aki ta marca un paso importante den e mision di DAO pa haci conseho laboral y informacion preventivo mas accesibel pa tur ciudadano.

   Di conflicto pa prevencion: E lansamento di Tienda Legal Laboral ta hopi mas cu un cambio di nomber; e ta representa un forma nobo y proactivo di traha. Caminda antes e enfoke tabata riba soluciona conflictonan laboral cu a surgi caba, TLL ta fungi awor tambe como un centro di informacion central cu ta enfoca riba prevencion.

   Door di informa trahado y dunado di trabao den un fase trempan tocante nan derechonan y debernan, TLL ta aspira na un mercado laboral mas sano y transparente na Aruba.

   Un punto clave di e proyecto piloto aki ta e accesibilidad. Door di ta presente fisicamente den bario, DAO ta baha e drempel pa haya conseho significativamente. Cu e localidad nobo aki, strategicamente situa na MFA Paradera, mas hende por haya sosten cerca di nan cas of trabao. Banda di e prome localidad na MFA Savaneta, e di dos localidad na MFA Paradera ‘Cas di Mito’ na Paradera 145-C, ta ofrece e posibilidad pa brinda sosten den un ambiente neutral y di confianza.

   Intake y Servicio: Tienda Legal Laboral ta basa su servicio riba cinco pilar: Husto, Profesional, Servicial, Uniforme y Accesibel. Sea ta trata di pregunta tocante pago di salario, contract laboral of mediacion den caso di conflicto; TLL ta cla pa yuda tanto trahado como dunado di trabao.

   Intake cuminsando diamars 26 di mei.  Pa mantene e drempel mas abou posibel, TLL lo funciona a base di ‘intake’. Nos lo purba atende ciudadanonan mesora segun disponibilidad. Si esaki no ta posibel, nos ta yuda traha un cita pa un otro momento.

   Cuminsando diamars 26 di mei, e siguiente orarionan pa intake lo ta vigente na MFA Savaneta y MFA Paradera ta di Dialuna pa Diabeirna di 8:00 am pa 12:00 pm, y di 1:00 pm te cu 3:00 pm.  Excepto Diaranson, cu ta di 8:00 am te cu 12:00 pm.

   Nan ta invita comunidad pa bin conoce e forma nobo aki di servicio. Pa mas informacion, bo por bishita nos localidadnan of tuma contacto via MFA Savaneta na 593-2107 y MFA Paradera na 593-8549.  Via email por contact na: This email address is being protected from spambots. You need JavaScript enabled to view it.

   Departamento di Labor y Investigacion ta invita e comunidad completo pa bin cera conoci cu e forma nobo di servicio aki. Hunto nos ta traha riba husticia na pia di trabao, den bo bario.