Anette Kelly-Wester di POH Aruba:
ORANJESTAD (AAN) – Praktijkondersteuner Huisartsenzorg (POH) a bira un pilar fundamental den cuido preventivo na Aruba. Desde su introduccion como proyecto piloto na 2012, e funcion aki a contribui enormemente na guia, educacion y acompañamento di pashentnan cu diferente condicionnan di salud. Cu dedicacion, conocemento y preparacion profesional, POH’nan ta sigui fortalece cuido primario y promove un comunidad mas saludabel.
E funcion di POH a origina na Hulanda y actualmente tambe tin presencia na Aruba, Boneiro y Corsou. Entre e islanan tin un bon colaboracion y comunicacion continuo, unda regularmente ta participa den encuentronan profesional pa intercambia experiencia, conocemento y ideanan nobo. Tambe tin programanan di stage y cooperacion profesional cu ta yuda mantene e relacion estrecho entre e diferente POH’nan den region.
Anette Kelly-Wester di POH Aruba, den conexion cu Dia di POH celebra dia 22 di mei, a comparti mas informacion tocante e importante funcion di POH na Aruba. Segun señora Kelly-Wester, e profesion aki ta exigi hopi amor, dedicacion y pasenshi, considerando cu diariamente POH’nan ta trata cu pashentnan cu diferente dificultad y condicionnan cronico.
POH ta un enfermera cu especialisacion adicional. E funcion ta representa un paso mas den preparacion profesional, pero cu mesun balor y importancia tanto pa e POH’nan como pa e asistentenan cu tambe ta sigui e opleiding. Tur ta traha cu un meta comun: brinda e mihor cuido y guia posibel pa bienestar di e pashentnan.
Actualmente Aruba tin 43 POH den cuido somatico, enfoca principalmente riba malesanan cronico manera diabetes, presion halto y colesterol halto, entre otro condicionnan di salud. Entre nan, tin 5 POH-GGZ, cu ta specialisa specificamente den cuido di salud mental.
“Esaki ta e prome grupo y nos ta spera cu pronto e grupo aki lo sigui crece, pa asina por conta cu mas personal capacita pa brinda apoyo den problemanan di salud mental”, señora Kelly-Wester a expresa.
Un di e mayor retonan cu POH’nan ta enfrenta, segun señora Kelly-Wester, ta cu hopi pashent no semper ta presenta na nan citanan. Esaki por stroba nan di haya e guia, conseho y educacion necesario na tempo, sea riba alimentacion, uzo corecto di medicamento of maneho di malesanan cronico manera diabetes y presion halto.
E labor di un POH no ta limita solamente na un consulta medico, sino cu ta refleha den e decisionnan diario cu un persona ta haci tocante alimentacion, estilo di bida y disciplina den su cuido medico. Cu mas compromiso, consciencia y colaboracion entre proveedor di cuido y comunidad, Aruba por sigui avansa pa un futuro cu mas bienestar, menos complicacionnan cronico y un calidad di bida mas halto pa tur ciudadano.
