E di dos grupo di 90 studiante arubiano a yega Hulanda

ORANJESTAD (AAN))/Den Haag  – Cu vuelo 771  di KLM a yega diamars 3 di augustus un cantidad di 90 studiante Arubiano pa sigi un estudio avansa na nivel di HBO of Universidad na Hulanda.

            Esaki ta e di dos vuelo cu studiante cu ta yega Hulanda. Ta trata aki di studiantenan cu ta bai studia na Leeuwarden, Groningen, Wageningen, Arnhem, Nijmegen, Tilburg y Breda.

            Na Schiphol un delegacion consistiendo funcionarionan di Departamento di Enseñansa di Arubahuis, studiementor y miembronan di e POC (Plaatselijke Opvangcommissie) - mescos cu ayera - a ricibi e studiantenan.

            Pafor di e sala di yegada e studiantenan na un forma bon coordina y organisa a haya instruccion di personal di Cas di Aruba, mentornan y miembronan di e POC unda nan mester a para den grupo pa warda nan turno pa bai na e bus cu lo hiba nan na nan ciudad di estudio.           Banda di Robby Schouten cu a haci grabacion na Schiphol, tambe Roy Kelly di e website Arubiano.nl a saca potret di e studiantenan.

            Ayera e studiantenan por a descansa pa awe nan cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia necesario den nan ciudad unda pa sigur cuater aña of mas nan lo biba y studia.

            E prome aña e studiante ta ricibi guia di e studiementor, pero pa e resto di su estudio e ta cai bou di Arubahuis.

            E aña aki e studiantenan a ricibi como regalo un ehemplar di e buki ‘Sombra di Recuerdo’ di e conocido escritor Arubano Quito Nicolaas. Un palabra di gradicimento ta bai pa Bookish Plaza, Irene de Cuba y Quito Nicolaas pa e bunita gesto aki na nos studiantenan.

Potretnan ta cortesia di Cas di Aruba