Hulanda a scapa e moneda nacional di e olanan bruto y barancanan - Aruba mester di un museo pa monumentonan cu Mike a laga atras - Poco gobernante na mundo a logra e produccion di obra clasico
ORANJESTAD(AAN)- Den e dianan cu a pasa, Mike tabata den noticia. Mike a haya oportunidad pa drenta publicidad como gran defensor di monumentonan na Aruba y den e caso aki dos school cu for di momento cu el a bira Prome Ministro, a wordo discrimina.
Tur cos den mundo tin nan hora. Tur cos den mundo tin nan momento. Esaki sigur tabata e caso ora cu casi un decada despues cu e mester a drenta den accion y haci e trabou, Mike a sali na defensa di dos school cu el a lubida.
Ta bon cu Mike conoce e caminda pa haya atencion di publico y asina na un forma rapido el a splica Aruba su posicion como e gran protector di monumentonan na Aruba.
Mike casi a kibra nos curason si no tabata pa e hecho, cu for di olanan bruto di lama yena cu baranca, por a scucha gritonan di auxilio di Florin Arubano, cu casi tabata zink pero a scapa ora Hulanda a mara mannan di Mike y a tira un salbabida pa Mike.
Mike tabata tin rason di bisa cu el a laga cantidad di obra clasico atras despues cu na 2017, Pueblo a dicidi cu e mester bay cas. Obranan cu por mira tur parti na Aruba pero cu lamentablemente den nan gran mayoria no por drenta un museo cu e nomber “Museo Herencia di Mike”.
Ta un lastima cu e futuro generacionnan di Aruba no por mira e logronan di Mike, cu poco gobernante na nivel mundial, a logra produci.
Na cual pais, por invita turistanan realisa un gira pa contempla e monumentonan di Mike na aire libre? E coleccion di rotonde di Aruba, sin duda ta uno di mas grandi cu continentenan conoce y sigur lo no topa facil un isla chikito, cu por competi cu Aruba ora ta trata di rotonde.
Naturalmente tin e beyesanan di viaducto, cu mester cubri cu mata, cu a nenga di nace. Awor por contempla obranan cu tin tur derecho pa competi contra ruinanan di sitionan caminda historia clasico a wordo skirbi.
Den un museo di Mike sigur por a pone un tram, rondona pa portretnan di Mike sinta, Mike riba pia, Mike contento, Mike furioso.
Pero e obra mas grandi di Mike, cu sigur merece un museo, ta pober Florin. E problemanan cu e moneda nacional a pasa ora Mike a haya poder, ta historico y sigur monumental.
Poco moneda na mundo a sobrevivi loke Florin mester a soporta for di momento cu Mike a haci su entrada y a duna prueba cu un pais tin placa pa gasta, sigur si lider di e pais ta biba den Penthouse cu bista riba lama caminda Florin casi a mira su fin den olanan turbulento.
E peliger cu Florin a enfrenta ta keda e obra monumental di Mike cu na un pais, cu no tabata tin Reino pa sigui entrega asistencia financiero, lo a zink den e lama bruto di maneho financiero di Mike.
Museo y monumento ta sirbi pa recorda historia di un Pueblo. Ora na Aruba contempla Florin, lama bruto y baranca, pensamento ta bay directamente den direccion di Mike, cu casi a logra cu Florin lo tin mes balor cu e Bolivar di su gran amigo, Nicolas Maduro.
