ORANJESTAD (AAN) – Manera ta conoci Inglatera (Reino Uni) ta e prome pais na mundo cu a aproba e pildora antiviral contra Covid-19, y e expectativa na Inglatera, Europa y mundo henter, ta grandi cu e remedi aki por haci, por fin, e diferencia.
Segun un publicacion di fecha 4 di November ultimo di AFP, dicho remedi cu ta carga e nomber di Molnupiravir, produci pa e compania Handout Merck y Co, inc, a keda aproba for di Diahuebs, siman pasa, door di Reino Uni pa trata e personanan contagia cu Covid-19 y e ta funciona cu esnan cu den un prueba a sali positivo pa coronavirus, y pa esnan cu ta presenta alomenos un factor di riesgo pa desaroya un malesa grave.
E Comunidad Cientifico na mundo, ta considera esaki como un hopi bon noticia. E companianan farmaceutico Merc, Sharp, Dohme y Ridgeback Biotherapeutic a desaroya e Molnupiravir, como e prome medicamento pa trata coronavirus, cu por wordo tuma den forma di pildora na luga di angua.
Di e manera aki, Reino Uni ta converti den e prome pais na mundo cu ta aproba un antiviral pa trata Covid-19 cu por cumpra y hiba cas, manera e Minister di Salud di Inglatera, Sayid Javid, a destaca señalando cu dia 4 di November tabata un dia historico.
E Agencia Regulador di Medicamentonan (MHRA) a informa cu e remedi por wordo suministra na e pacient mesora, despues cu a duna positivo pa covid-19 of dentro di cinco dia despues di e confirmacion di e infeccion.
E agencia aki ta recomenda uza e Molnupiravir den hende cu Covid-19 cu tin e virus di leve pa modera y cu tin alomenos, un factor di riesgo manera obesidad, diabetes, malesa di curazon, of den 60 plussers.
“Sin compromete e calidad, e seguridad y eficacia, e publico por confia cu MHRA a realiza un evaluacion solido y exhaustivo di e datonan tocante e Molnupiravir” e director di MHRA, June Raine a bisa pa e medio ya menciona.
Informacion compila na Luna di October ultimo, ta mustra cu e producto nobo aki, lo por reduci na mitad e posibilidadnan di fayece of wordo hospitaliza, na causa di covid-19, pa e personanan cu mayor riesgo di desaroya e virus.
E funcionamento di Molnupiravir ta consisti den ataca un enzima cu e coronavirus ta utiliza pa copia su mes. Di e manera aki e ta preveni su multiplicacion y ta mantene un carga viral na nivelnan abao den e organismo, reduciendo e gravedad di e malesa.
EFICAZ CONTRA VARIANTENAN:
E compania Farmaceutico Merck ta señala cu e tratamento mester ta igual di efectivo dilanti e variantenan nobo di coronavirus cu por surgi den futuro. Segun e multinacional, Molnupiravir ta eficaz contra tur e variantenan actual, incluyendo Delta, cu ta altamente infeccioso y responsable di e aumento di hospitalizacion y mortonan na nivel mundial.
Autoridadnan di Reino Uni, ta spera di haya luz berde pa cuminza suministra e tratamento antiviral aki den e comunidad.
