Rycond Santos Do Nacimento y Gerlien Croes por bira lider di AVP? -- *AVP lo no tin un Eman nobo pa dirigi e partido pa eleccionnan 2025 --- *Edad of persecucion legal por ta fin di actual “Back to back” di Mike
ORANJESTAD (AAN) — Cu eleccion 2021 tabata uno crucial pa AVP tabata un hecho. E cantidad di cortina di huma cu e partido a lanta pa desprestigia entre otro Censo, e proceso electoral y tur loke ta pertenece na e sistema electoral di Aruba, a laga hopi pregunta habri.
Atakenan pisa y hasta di nivel abou ta wordo lansa dor di AVP riba gobernacion actual mientras cu conocedornan politico ta comenta cu tin algo den e wea politico di AVP, cu a wordo pone na candela.
Con AVP ta bay enfrenta eleccion 2025?
Cu e expertonan cu ta asisti DIARIO den e investigacionnan di e columnanan aki, nos a bay analisa aspectonan cu no ta bini dilanti di AVP, cu ta den un situacion politico sumamente dificil.
Despues di eleccion, cierto miembronan basta fuerte di AVP, no a bolbe den Parlamento caminda Mike a haci su acto di presencia manera el a priminti.
Con AVP como e partido cu ta base di oposicion pa su cantidad di voto, ta realmente posiciona den politica actualmente y cuanto reto e partido ta enfrenta actualmente y ta sconde tras di un politica di ataca pa ataca?
E figura di e lider di AVP ta stabil? No!
E prome motibo cu ta haci cu e liderazgo di Mike Eman no por wordo considera stabil ta, cu Mike ta responsabel pa e caos financiero y economico di Aruba mientras AVP mes ta haci Mike co-responsabel di tur escandalo cu a rementa den e partido.
AVP den su posicion di oposicion, ta mantene cu un Ministro Presidente TA responsabel pa tur loke pasa den su Gobierno y ta aplica esaki contra actual gobernacion.
Ya cu democracia no conoce discriminacion, esaki ta nifica cu Mike Eman como Ministro Presidente tabata responsabel pa tur loke miembronan di su Gabinete a haci y hasta loke su partido a haci.
Segun e punto di salida di AVP, den tur escandalo di Benny, di Paul, Refineria di Aruba, Mike como Prome Ministro ta culpabel a base di e pensamentonan di AVP.
Punto number 2, cuanto tempo Mike por keda lider di e partido AVP, cu ta considera su mes “partido di hende hoben”?
Na 2021 Mike Eman a cumpli 60 aña di edad. Pa eleccion 2025, Mike Eman lo tin 64 aña. Si e bira Prome Ministro na 2025, e lo acerca 70 aña como Prome Ministro. Si e keda lider di AVP, e ta lider di e partido como adulto mayor.
Un analisis ta mustra cu na 2017, no solamente e desastre cu a keda atras, pero tambe edad, a haci pa Mike hunto cu su grupo “Back to Back” habri caminda pa hobenan tabata na cabez di e lista di AVP na 2021.
Benny Sevinger cu e parha Avestruz a duna popularidad, a nace 12 di juni 1965. Sevinger, cu sin duda a traha duro durante su temporada na Colombia, ta mas hoben cu Mike de Meza, cu a nace 13 di Mei 1963 na Curacao.
Arthur Dowers, kende a nace na Trinidad na 1965, ta algun luna mas hoben cu Benny.
Mike Eman tin e edad mas avansa den su partido, cu mester a habri porta pa hobennan.
Pa un tempo a pensa cu Richard Arends tabata Principe Heredero. Pero e Rapport di Refineria di Aruba, cu ta den man di Ministerio Publico, a haci cu Arends a tuma un break politico.
Kende por reemplasa Mike Eman cu ya a bira 60+? Gerlien Croes, naci na Hulanda pero cu a bolbe Aruba, ta parce di ta e opcion di Mike.
Pero mr. dr. Rycond dos Santos Do Nascimento tambe ta mas presente cu nunca, aunke su presentacion ta haci hende puntra, si nivel ta algo cu a muri.
Esaki, sinembargo, no ta e topico cu nos ta analisa awe.
Gerlien lo reemplasa Mike of Rycond lo bira lider di AVP?
Gerlien ta Croes y Rycond ta Dos Santos.
Pasado ta topa cu futuro pa presenta e problema serio cu tin den AVP, cu un lider cu a bira 60+ despues di e crea e pio desaster gubernamental cu Aruba por a conoce.
