Chayote: Delicioso y cu hopi beneficio pa e organismo humano

Excelente pa cuminza cultiv'e na Aruba: 

ORANJESTAD (AAN) – Tin un berdura original di America Central y Mexico, cu a cuminza bira hopi popular na Aruba y cu ta un alimento hopi completo. Ya por mire den casi tur supermercado, y tambe por ripara cu cada bez e ta birando mas caro, net un motibo pa cultiv'e localmente.

E mata tin su nomber y fam cientifico, cu ta Sechium Edule, pero popularmente ta conoci como “chayotera” y su fruto ta e chayote y, por ehemplo, na Colombia nan ta yame cidra.

E paisnan unda originalmente a cuminza crece e chayote ta Mexico, Costa Rica y Guatemala, pero su cultivo  a extende te na Argentina,  Colombia, etc., y awendia e ta wordo cultiva na Italia, India y China.

E mata ta un di esnan cu ta lastra y trepa, por ehemplo den cura y si tin un palo halto eynan e ta subi tambe te halto. E ta un mata di tronco robusto y por midi te 10 meter di largura. Su blachinan ta adherente. Tin diferente sorto di chayote, esun chikito y tierno cu por casca manera e batata, esun mas grandi di casca duro, cu mester cushin'e pa por kita su casca, y e chayote cubri di sumpiña.

E flornan di e planta di chayote ta unisexual, siendo esnan masculino di color geel y esnan femenino ta color berde.

E fruto, kiermen e chayote, tin forma di pear. Su color di casca por varia di berde scur te geel palido. E carni di e fruto ta blanco y meymey tin un semia unico, plano, liso y rondona di fibra. Na America Latina e semia ta wordo yama “e pepa”.

E cultivo di e chayotera ta, fundamentalmente debi, na e uso cu su fruto tin den e consumo humano. Su utilizacion como hortaliza ta comun den henter America Central, unda e centronan mas grandi di cultivo ta situa. Su raiz, ta un tuberculo tambe cu propiedadnan alimenticio.

E ta un hortaliza cu cual por traha diferente tipo di cuminda (chayote tierno cu carni, plato tipico di Costa Rica, of su raiz hasa cu webo), simplemente herbe cu un tiki salo, y ta wordo hopi uza den e preparacion di cuminda pa baby.

E blachinan tierno di e chayotera ta wordo uza pa prepara salada. 

PROPIEDADNAN:

E chayote ta un excelente pa 'detox', locual ta permiti, principalmente, un importante eliminacion di toxina via urina.

Tambe e ta posee un cantidad substancial di mineral, specialmente potasio y zinc, cu ta faborece e formacion di enzima y nan ta colabora cu e proceso metabolic di e proteina y carbohidrato.

E zinc, particularmente, ta importante den e formacion di weso y diente. Cien gram di chayote diariamente, ta aporte e balor di e mineral aki cu e curpa ta rekeri pa dia.

E chayote ta posee siete di e 9 aminoacidonan esencial cu e organismo mester den e proceso di formacion di proteina. Ban corda cu e proteina ta interveni, entre otro, den e formacion di enzima, hormone y neurotransmisornan. 

CULTIVO:

Door di su origen den climanan tropical, ta importante cu e cultivo di chayote tuma lugar unda e por ricibi abundante solo mainta, y debi cu ta un planta cu ta lastra y trepa, cu e wordo sembra unda tin palonan alto unda e por adheri su mes, y haya sombra adecua. Ta parce cu Aruba pa su clima y e palonan di kwihi ta un lugar ideal pa cultiva chayote. E mester di hopi awa si.