Shailiny Tromp-Lee den reunion cu SNBA
ORANJESTAD (AAN): Diamars 3 di februari 2026 a tuma lugar un reunion importante entre San Nicolas Business Association (SNBA) y e Comicion di Finanzas, Overheidorganizaties, Cultura y Deporte di Parlamento. E encuentro aki, presidi pa mi persona Shailiny Tromp-Lee, ta un continuacion di e reunion cu a inicia dia 3 di december 2025.
Final di Augustus, comienso di September 2025 tur Fraccion den Parlamento a ricibi e documento titula “Vision for San Nicolas & Surrounding Districts 2025 & Beyond” for di SNBA. Como parlamentario mi a scan e documento aki y a pidi e Griffier di mi comision pa yama un reunion cu SNBA pa nan bin trata e documento aki cu nos comision. Un documento cu ta trata diferente puntonan manera diversificacion, posibilidad di inversion, actividad industrial, vivienda, desaroyo cultural y mucho mas.
Na final di e prome encuentro di dia 3 di December 2025, a keda palabra cu SNBA cu lo organiza diferente reunion separa pa trata e topiconan cu no por a keda debidamente atendi, cu e meta pa sigui atende posibel solucionnan pa retonan cu ta afecta nos pais y of pa trata plannan pa futuro, principalmente pa San Nicolas.
Durante e reunion di dia 3 di februari 2026 nos a enfoca riba e topico di Vivienda Pagabel (Affordable Housing) y a trata esaki extensamente. Segun e Plan Nacional di Vivienda pa Aruba di SNBA, nos pais ta enfrenta un deficit di aproximadamente 10.000 cas pa por cumpli cu e demanda actual. E maneho cu SNBA ta propone tin como vision pa garantisa cu tur residente di Aruba tin acceso na casnan di calidad, pagabel y sigur, empoderando e famianan cu actualmente ta paga huur pa nan por inverti den nan mesun hogar. Mirando e realidad riba e topico aki mi ta haya hopi importante y necesario pa scucha e opinion y solucion di diferente stakeholders. Pasobra e ta un topico cu nos mester sigui atende como prioridad y cu urgencia.
SNBA a splica e motibonan pakico segun nan e sistema actual ta faya: (*) Financiamento: e banconan ta exigi un pago inicial (down payment) di 15% pa 30%, locual ta imposibel pa hopi famia spaar. (*) Permisonan: E proceso pa haya permiso di construccion ta dura entre 2 pa 3 aña, locual ta kibra e factibilidad financiero di e proyectonan. (*) Oferta: E prijsnan di construccion ta infla debi cu e sector di construccion ta priorisa proyectonan den turismo unda e ganashi ta mas halto.
Alavez durante e reunion SNBA a presenta posibel solucionnan y un strategia basa riba tres pilar fundamental pa resolve e crisis di vivienda:
(*) Sosten Financiero: nan ta propone creacion di un Fondo Nacional pa Vivienda cu lo wordo financia pa medio di entre otro un contribucion boluntario di empleado/empleador, un "Tourism Transfer Tax" di 2% riba transferencianan di turismo, y un cobransa riba rentals di corto duracion manera Airbnb.
(*) Acelera e proceso di permiso: nan proposicion ta pa crea un solo oficina di permiso (One-stop shop) unda tur instancia (DOW, DIP, WEB, Elmar, etc.) ta colabora pa duna contesta den un maximo di 3 luna.
(*) Construccion na Scala: Implementacion di proyectonan ya diseña, manera un ehempel di 63 cas cu ta cla pa wordo ehecuta cu prijsnan cuminsando na Afl. 285,000.
Tur ta posibilidadnan cu na mi opinion como Parlamento nos mester urgi gobierno pa explora y duna atencion den tur seriedad.
E serie di reunionnan cu SNBA lo continua, y Shailiny Tromp-Lee como Parlamentario ta enfatisa e importancia vital di e topiconan aki pa e futuro di Aruba. Sinembargo, mi mester expresa tambe cu ta un lastima cu ni un representante di fraccion di Futuro, ni un representante di e fraccion di AVP tabata presente den e reunion aki.
E crisis di vivienda no ta refleho di un cifra abstracto, sino un lucha diario pa miles di famia. E presencia di e partidonan aki den dialogonan importante cu stakeholders riba e topico aki ta fundamental y pesey mes mi ta haya lamentable cu nan no a asisti na e reunion. Ta spera cu awe si nan lo ta presente pa e siguiente sesion.
