Desiree Thode-Helder, Directora di Directie Ouderenzaken:
ORANJESTAD (AAN): Señora Desiree Thode-Helder, Directora di Directie Ouderenzaken, recientemente a informa tocante e exigencianan nobo di calidad di cuido cu lo introduci na casnan di cuido di adultonan mayor.
El a menciona tambe cu algun cas di cuido ya tin programa pa pasadia caba na unda nan ta ofrece mas actividad na nan clientenan. Pero pa habri un pasadia den e casnan di cuido, lo mester huur personal y esaki ta rekeri fondonan extra. Directie Ouderenzaken ta recomenda pa tin un persona den dienst y cu ta bay na e diferente casnan pa haci actividad cu e clientenan. Di e manera aki, nan lo no keda sin nada di haci.
Planta mata ta un actividad cu ta den plan, den conbenio cu Santa Rosa, y cu EPI, cu ta pone trahamento di bakinan di mata den nan curiculo, pa asina e clientenan por cuminsa planta den un manera accesibel pa tur, hasta pa esnan den rolstoel of cu no por cana bon. E proceso pa delinea con pa encamina e proyecto aki ta bayendo bon.
Tocante e infrastructura di casnan di cuido, señora Thode-Helder a remarca cu ta hopi importante pa esakinan ta debido, entre otro si tin suficiente espacio entre e camanan, un baño adecua y adapta na e necesidadnan di e adultonan mayor, y tambe caminda di tene den caso cu tin trapi. Esaki lo cuminsa den fase dos di e implementacion di e exigencianan di cuido.
Señora Thode-Helder a enfatisa cu e meta di e exigencianan di calidad di cuido pa casnan di cuido, ta pa garantisa calidad, siguridad y dignidad pa nos adultonan mayor. Nan merece miho atencion profesional, ambiente adecua y proteccion real.
