Inversionnan enorme ta wordo haci pa adapta na cambio mundial
*Planificacion pa bandona uzo di azeta enfrente e reto tecnologico
*Menos gasto di personal ta mas gasto y trabou na planta di coriente
ORANJESTAD(AAN)—Uno di e pruebanan mas grandi di e beneficionan di e entrada di Inteligencia Artificial, tabata e forma cu mundo por a comunica y e uzo di sistemanan computeriza cu a facilita e proceso pa atende cu e pandemia di Covid-19.
Transformacion total den maneho di produccion, investigacion y comunicacion necesario mescos cu e procesonan pa por warda y procesa informacion, a bira realidad.
Automatisacion mundial a kita bista di mundo for di e realidad di e forma cu e careda pa mas y mihor Inteligencia Artificial tabata afecta e necesidad pa generacion di coriente y asina pa combustibel.
Menos gasto di personal a bira mucho mas gasto na combustiel pa genera coriente, cu ta necesario pa procesa tur data cu ta base di energia artificial.
Inversionnan enorme a bira necesario pa adapta mundo na e funcionamento di e Era di Inteligencia Artificial cu no conoce energia humano, pero mester di coriente pues uzo di energia pa e por funciona.
Na partinan di mundo caminda proyectonan di centronan pa atende cu data ta mira luz, e costo di coriente ta subi barbaramente a base di e cantidad di combustibel cu ta necesario pa alimenta e progreso humano cu aparatonan cu por supera capacidad di hende den produccion.
Mundo awe ta haci uzo di chatbots. Diariamente miyones y miyones di informacion ta wordo comparti rond mundo. Cantidd di computer ta labora den e proceso pa henter pasa informacion pa otro den un produccion mundial, cu no ta ricibi atencion necesario pa e demandanan cu e ta exigi.
Mundo kier despedi di petroleo. Mundo ta papia di bateria. Mundo ta papia di e energia cu ta necesario pa alcansa haci uzo di e loke Inteligencia Artificial por produci den maneho moderno di economia di raza humano.
Mientras hende ta considera di un banda cu e avance tecnologico ta algo formidabel, e costo halto riba tur tereno ta wordo ignora.
E exigencianan di coriente pa funcionamento di Inteligencia Artificial, ta afecta e disponibilidad pa casnan di familia y bida normal di e ser humano.
Centronan di data ta bira beneficio economico pa comunidadnan pero ta exigi expansion di produccion di coriente cu hasta dobbel e cantidad di energia cu ta wordo uza.
Otro parti interesante di e problema ta, cu Inteligencia Artificial no tin transparencia pa loke ta trata su exigencia, loke ta afecta e costo di energia pero tambe ta bira un peligro mas grandi pa cambio di clima den cual hende ta inverti sumanan enorme.
Kico e costo real di Inteligencia Artificial ta, no ta bira conoci manera lo mester ta te awor sigur na lugarnan caminda centronan di exploracion y expansion di Inteligencia Artificial no ta entrega cifranan cu hende mester pa realiza con halto e gasto ta realmente.
Un situacion fastioso sigur den e realidad mundial di hende na careda pa adapta na Inteligencia Artificial, cu haci hende bobo ariba e tereno pa conclui kico e gastonan ta, kico e ganashi pero mas cu tur cos kico ta adelanto real y kico problema creciente.
DIARIO na e momentonan aki ta realizando investigacionnan ariba temanan cu lamentablemente no ta ricibi e atencion di hende, cu ta enfrenta un mundo cu diariamente ta wordo cambia dor di Inteligencia Artificial, cu impactonan serio manera comunidadnan na hopi parti di mundo, ya ta trece dilanti pero sin suficiente voz pa hende realiza peliger di e careda pa un mundo domina pa e efectonan di e Era di Inteligencia Artificial.
Di costonan cu no ta baha pero ta subi, te cambionan cu ta afecta bida normal directamente, e partinan di problema di Energia Artificial, ta wordo silencia tras di cortinanan di inversionnan enorme cu por crea mas necesidad pa inversion ora nan realidad bati na porta di comunidadnan di e ser humano!
