Cinthia Quant:
ORANJESTAD (AAN): Fundacion Contra Violencia Relacional (FCVR) tin un rol fundamental den nos comunidad como un organisacion principal cu ta dedica trabounan pa preveni y combati violencia relacional y domestico na Aruba. E fundacion ta un centro reconoci nacionalmente, cu ta ofrece refugio, guia, tratamento, y educacion pa victimanan di violencia, especialmente hende muhe, mucha, y grupo vulnerabel.
Sinembargo, FCVR ta pasa door di retonan cu por stroba, ‘slow down’ y of limita nan trabounan. Señora Cinthia Quant, Program Manager di FCVR, ta indica cu un di e retonan cu nan ta enfrenta ta e condicion di e shelter. E costo di mantencion ta hopi halto. Apart di esey, un otro reto ta e ekipo chikito cu ta carga hopi responsabilidad.
Señora Quant a remarca cu activamente nan ta buscando donante y colaboradonan. Actualmente, nan ta trahando cu hopi colaborado y aliadonan cu mas y mas ta kere den e causa fundamental di FCVR. “Nos ta hopi gradicido na cada un di nan y nos ta hopi responsabel y transparente cu cada cos cu nos ta haci cu e fondonan cu nos ta haya.”
Apesar cu e ekipo di trahado ta hopi chikito, señora Quant a duna di conoce cu nan ta hopi creativo. Cu tiki fondo, toch nan ta logra hopi. Pero e reto di mas grandi y e prioridad ta e shelter. Mester inverti den esaki pa asina brinda un servicio adecua na e clientenan cu tin mester.
E fundacion ta contento cu e cambionan y crecemento y mas y mas nan ta trahando riba un miho fundeshi pa comunidad tin e siguransa cu nan ta atende cu e problematica di violencia relacional y domestico pa mehora e servicio cu nan ta brinda den tur aspecto. Mientras Aruba ta sigui enfrenta e realidadnan tristo aki, FCVR ta sigui sirbi nos comunidad cu speransa y determinacion. Nan trabou no solamente ta esencial, sino transformativo.
