Parlamentario Stephany Sevinger (AVP):
ORANJESTAD (AAN): Segun parlamentario di AVP, Stephany Sevinger, for di principio di e gobernacion nobo, oposicion ta intenta crea un narrativa falso di cu “no a aloca e fondonan pa FCCA y cu gobierno ta anti construccion di cas social.” Den un encuentro cu prensa diamars mainta, Sevinger a pone echo riba mesa: FCCA tin asina hopi peticion pasobra gobierno a cambia na 2017 e rekisitonan pa yega na bo propio terreno y posteriormente, na 2021, e mesun gobierno ey, a traves di otro minister di infrastructura a bin cu ainda mas rekisito.”
E cambio aki a trece barera innecesario pa famianan: “A hacie hopi dificil pa hende yega na su propio tereno. Por ehempel, mester construi 20% minimo cu despues a hisa na 30%. Obligatoriamente mester cera un hipoteca cu banco pa yega na opcion di tereno, y a corta e tempo cu tin pa haya carta di banco.”
E ta enfatisa cu practica financiero local no ta ahusta na e realidad laboral local: Instancianan financiero por stimula construccion di vivienda door di baha e tarifa di hipoteca. Tambe por inclui tips for di esunnan den horeca como entrada pa cumpli cu e criterio pa haya financiamiento.
Pa enfrenta e obstaculonan, Sevinger a presenta varios mocion. Un caminda ta urgi gobierno pa revisa y ahusta e meter cuadra minimo di construccion, revisa e calculo di bouwprijs per meter, pasobra ora cu mester “construi mas riba e tereno, pero tambe na un prijs mas halto, tin menos chens cu banco ta financia homber chikito; pa elimina e obligacion di cera hipoteca exclusivamente cu instancia financiero, permiti tambe fondo propio of ayudo familiar como prueba di capacidad; pa ahusta e plazo di construccion na un termino mas humano. AVP kier pa hacie 3 aña atrobe pasobra caba cas den un aña no ta factibel; y crea mecanismo pa reinscribi tur hende cu a haya un pre opcion y despues na DIP nan peticion a keda rechasa.
E cantidad di tereno otorga a disminui considerablemente entre gobierno di signatura AVP cu e dos ultimo bou liderazgo di MEP. “Di 2001 pa 2009 alrededor di 1200 tereno a keda parti y di 2009 pa 2017 a parti mas o menos 800 tereno, mientras cu di 2017 pa 2024 a duna opcion na aproximadamente 50 tereno pa aña. Esey ta sin conta cuanto di berdad a logra construi nan hogar caminda un gran mayoria inevitablemente a perde e opcion.”
AVP ta sigui traha pa concretisa un huurtoeslag. Fraccion a puntra e minister kende a informa cu dialogo ta tumando luga pa introduci un subsidio di gobierno pa persona cu ta huur, independientemente si ta for di FCCA of no. Esaki tambe lo alivia e presion for di FCCA pa vivienda social.
Finalmente, Sevinger a entrega un di tres mocion crucial pa salud publico y turismo: duna AWSS instruccion cla y specifico pa desaroya un diseño pa un planta nobo di tratamento di awa di riool cu lo por cumpli cu e capacidad necesario pa e siguiente 25 aña y segun standard internacional, ubica “na un localidad diferente cu no ta den centro di area turistico pa evita molester.
Sevinger a pidi gobierno pa den dos luna AWSS presenta kico ta e situacion actual na e tres planta (Zeewijk, Parkietenbos y Bubaliplas) y un plan specifico na corto, medio y largo plazo. E parlamentario a compromete di keda monitor pa gobierno cumpli cu e mocionnan aproba den parlamento y mantene pueblo informa,” Sevinger a conclui, subrayando cu e meta di AVP ta un mercado di vivienda mas husto, regla factibel y un infrastructura sano pa tur famia na Aruba.
