Ex-president di Simar, Ivo Valdes
ORANJESTAD (AAN): Ex-president di Sindicato Simar, Ivo Valdes a expresa cu Dia di Maestro ta un dia, no solamente pa celebra, pero tambe pa reflexiona riba e gran importancia cu educacion tin pa e progreso di un pais. Y sin lubida, un dia pa reconoce e rol fundamental cu cada maestro y docente ta hunga den e proceso aki. Educacion no ta un luho, pero un derecho!
Educacion ta e fundamento pa progreso, e ta e medio cu ta lanta un pueblo for di atraso pa desaroyo. Un pais cu no inverti den su sistema educativo ta un pais cu no ta inverti den su futuro. Educacion no ta solamente pa duna conocemento, pero tambe pa forma caracter, pa inspira curiosidad, y pa prepara e ciudadanonan cu por contribui positivamente na un sociedad cu ta cambia constantemente.
Den e contexto aki, nos tin di elogia y no lubida e balor incalculabel cu un maestro tin den un comunidad. Un maestro no ta solamente un persona cu ta pasa informacion.
Un maestro ta un guia, un mentor, un modelo pa sigui. A traves di boso dedicacion, pasenshi y amor pa enseñansa, boso ta forma e mente di nos futuro lider-, docter-, politico-, abogado-, artistanan y cada un di nos ciudadano cu ta hunga un rol den e progreso di nos comunidad.
E esfuerzo cu boso ta pone cada dia, e amor cu boso ta mustra pa forma mente y espirito di boso alumnonan ta e berdadero regalo pa e comunidad. Sin boso, no tin formacion y sin formacion, no tin desaroyo sin desaroyo no tin futuro.
Awe nos ta gradici cada maestro cu ta stima su ofishi, cu ta eherce un trabao cu no ta pa ganancia personal, pero pa e bienestar di henter nos pueblo. E balor di un maestro bo no ta midi den salario, pero den e impacto duradero cu boso ta lanta den e bida di cada studiante cu boso ta guia.
Den un mundo caminda e ritmo di cambio ta asina lihe, ta precisamente boso, e maestronan, ta e sosten di stabilidad y crecimento. Boso ta e luz cu ta guia henter nos comunidad pa un futuro miho, y esey ta un tarea cu mester haya reconocemento, aprecio y sosten constantemente.
Di curason, nos mester bisa boso: danki. Danki pa boso dedicacion, pa boso pasenshi, pa boso amor y pa e influencia positivo cu boso ta lanta den bida di cada studiante y den nos comunidad.
Feliz Dia di Maestro, y cu nos sigui honra y respeta e gran rol cu boso ta hunga den e futuro di nos comunidad.
