Segun Diego de Cuba, lider di STA:
ORANJESTAD (AAN)-- Diego de Cuba, lider di Sindicato STA, a sigui bisa den entrevista cu Matutino DIARIO cu, manera ta conoci tabata tin reunionnan cu a tuma lugar, si e no ta ekivoca aña pasa, caminda cu e deseo di Gobierno tabata pa haci e instancia di SVb e toezichthouder riba LAP.
“Pero ainda e parti aki no a wordo concretiza, loke ta implica cu e ta keda den man di e Minister pa actua. Awo, si bo tin suficiente inspector pa haci e trabao aki ta keda un pregunta pa haci, atrobe. Pero hecho ta keda cu e trahadornan di Thiel, pa keda perhudica, pasobra locual cu ta sosodiendo ta cu aworaki nan a yega 3% cu e compania tin di pone den e seguro di pensioen, y e trahador 3%.
Pero loke ta pasa ta, cu e compania no ta pone ni su parti ni esun cu ta retene di su trahadornan den e fondo. For di aña 2021 nan tabata resorta bao di ENNIA, y na aña 2024 ENNIA a dicidi di traha un carta y informa e trahadornan tocante locual ta e situacion, y esey tambe e Compania ENNIA a viola e LAP. Pasobra e ley ta bisa bo cu una bez cu e compania stop di paga e primanan, si e keda tres luna sin deposita e placa, e compania tin deber di informa tur e pagadornan di e situacion. Pero nan a haci esaki despues di casi tres aña”, Diego de Cuba a señala.
El a subraya cu e asunto aki tin consecuencia, pasobra fuera cu e placa aki no ta wordo deposita, e companianan di seguro aki ta inverti e placa den cierto negoshinan, caminda nan ta genera placa. “Anto p’esey nan ta paga cierto porcentahe, algo, riba loke bo ta pone. Aunke no ta mucho cos, pasobra despues cu e Ley aki (LAP) a wordo introduci, mi ta bisa cu ta un tremendo idea di a introduci un pensioen general riba full e pais aki, pero e introduccion y e vigilancia tabata total lose, anto akinan ta caminda cu e concepto di e Sindicato STA, nos ta sinti cu e companianan di seguro a probecha di e situacion tambe, y tin di nan cu no a cumpli debidamente, tampoco, cu e Landsverordening Algemeen Pensioen aki, y pa e motibo aki, Directiva di STA a dicidi cu nos ta bay pone un stop”, Presidente di STA a señal.
