Presidente di STA, Diego de Cuba ta denuncia:
*Igual pa loke ta Thiel Resources y CVC Construction
ORANJESTAD (AAN)-- Señor Diego de Cuba, President Sindicato di Trahadornan Arubano “STA”, a señala den entrevista cu Matutino DIARIO, cu e, trahadornan di e compania Thiel Corporation tin mas di 5 aña cu nan placa no ta bay pa e fondo di pensioen.
Recientemente, Diego de Cuba a dicidi di tin un reunion cu tur e trahadornan Thiel Corporation, Thiel Resources y tambe esnan cu ta cay bao di CVC Construction, pa splica nan e situacion fastioso cu STA ta confrontando e momentonan aki, cual ta e primanan di pensioen, cu no ta wordo paga na e companianan di seguro, y esaki ta algo cu ta sosodiendo pa añanan caba.
“Mi a splica nan tambe cu conforme e Landsverordening Algemeen Pensioen (LAP), cu locual e companianan aki ta haciendo ta un violacion total na e Ley di Pensioen aki. E Ley di Pensioen aki ta resorta bao di Minister di Finanzas, cu eigenlijk ta esun responsabel pa ta vigilante pa cumplimento di dicho Ley. Pero lamentablemente, mi tin cu bisa cu aki na Aruba no tin control riba e cosnan aki, y mi no por culpa e Minister actual pasobra esaki ta un situacion cu el a hereda, y e gobiernonan anterior tampoco a haci su huiswerk manera mester ta y nos ta den e situacion akinan aworaki, y mi ta bisa cu e ta di lamenta”, e lider sindical di STA a expresa.
El a sigui informa cu pa e motibo aki mes, STA a solicita, via nan abogado, un reunion cu caracter di urgencia cu Minister di Finanzas, señor Geoffrey Wever, y den su calidad di Presidente di STA tambe el a caba di manda un carta cu un peticion, pa si ta posible nan ta reuni sea mañan of Diahuebs di e siman aki, pa nan papia riba e tema aki, pasobra Minister tin e autoridad pa hiba un control den tur compania cu no ta cumpli debidamente cu e LAP.
