ORANJESTAD (AAN): Sindicato di Maestronan (SIMAR) tambe a reuni cu Formador di Gobierno Evelyn Wever-Croes y e team di formacion.
Josephine Albertus, Presidente di SIMAR a comparti su impresion riba con e reunion a bay.
El a señala cu riba agenda tabata tin dos topico. Un tabata e landspakket kwartaal 3 y e otro tabata e formacion mes di gobierno unda e sindicato por a trece nan puntonan dilanti.
Segun Albertus, SIMAR a hinca tur nan ponencia den un documento cual a wordo entrega na Formador diamars atardi.
Den e documento a djis subraya cu tin hopi cos cu tin cu cambia y no por cambia tur cos den un dia.
Loke nan ta wak den e Landspakket ta cu ta papia di 8 tema y no solamente e tema cu ta regarda enseñansa. Pero tambe tin otro temanan cu ta resalta pa SIMAR cu lo tin consecuencianan pa e trahador den veld di enseñansa, y esey nan a trece padilanti, a remarca.
E cambionan cu ta bin tin cu hacie hunto y pesey SIMAR ta sigui boga pa por tin dialogo, transparencia, envolvimento y participacion, Josephine Albertus a declara.
El a agrega cu door di haci esaki hunto lo tin sosten y pa por haci esey mester di dialogo.
