E bukinan fisico ta hopi importante pa e muchanan pasobra nan tin cu siña lesa y skirbi ainda

Lilian Semeleer di Biblioteca Nacional Aruba

ORANJESTAD (AAN):  Lilian Semeleer ta un documentalista y awendia e ta ocupa e funcion di 'Hoofd Bedrijfvoering' na Biblioteca Nacional Aruba. 1 di januari 1995 el a drenta den funcion na biblioteca y otro aña e ta celebra 30 aña di trabao.

            Ora cu Lilian a drenta den servicio el a bira parti di e proceso di automatisacion di biblioteca na 1996. E aña ey, biblioteca a bay completamente automatisa.

            Despues di esey por a wak cu gradualmente mas procesonan a bira automatisa te cu awo cu a bira digitalisa. E ta wak cu gradualmente ta bay dilanti. Compara cu Caribe, Aruba ta basta avansa. Pero compara cu paisnan mas desaroya, "nos ta meymey caminda", a expresa.

            Awendia biblioteca no ta pa djis presta buki. E ta un centro multifuncional cu ta inclui e parti social, actividadnan, entre otro.

            E ta wak hopi importante e parti di educacion cu ta e base pa e muchanan. "Pa un mucha por ta bon ekipa pa bay scol, e mester alomenos mil pa tres mil palabra prome cu su cuater añanan. Esey ta un fundeshi hopi importante pa tur mucha. Y si e falta e base ey, su estudio, su futuro ta bira p'e cada biaha", a expresa.

            Sra. Semeleer a indica tambe cu pa e muchanan e bukinan fisico ta keda importante pasobra nan tin cu siña lesa y skirbi ainda. Nan mester cana man cu man cu e digitalisacion, pero e parti fisico pa e mucha pasobra e tin cu siña skirbi y e tin cu lesa e buki.

            E parti ey ta hopi esencial den e desaroyo di e mucha cu pa nos ta e base, Lilian Semeleer a declara.