E tabata pa hopi aña e vocero di WEB Aruba NV
ORANJESTAD (AAN): E tabata un vocero cu tabata duna periodistanan su number personal di telefon, pa asina yam’e ora cu cualkier cos socede. Si acaso tabatin blackout, e tambe ta mobilisa pa planta di WEB Aruba NV pa asina ta pendiente di prensa.
Ta trata aki di Kelvin Patrick Augustin, kende pa hopi aña tabata e voz di WEB den tur asunto. Tempo ey trahando cu e director ing. Jossy Lacle, semper Kelvin tabata tene reunion cu prensa pa duna informacion claro di cualkier caso cu socede. Si diripiente hendenan ta haya awa troebel ta sali for di cranchi, e ta tene reunion cu prensa hunto cu ingenierona pa splica di con esey ta socede.
E tempo aya, hopi hende tabata prefera yama e.o. DIARIO pa raporta cu nan ta mira lek di awa cierto lugar. Ora yamadanan aki ta drenta, mesora DIARIO tabata pone Kelvin na altura pa asina core manda ploeg pa drecha tuberia rond Aruba.
Su cooperacion cu DIARIO y prensa en general tabata hopi grandi, y pesey pa Redaccion tabata un shock pa haya sa cu el a enfrenta complicacion cu su salud, y cu den fin di siman a fayece.
Kelvin naci na 1955, a fayece cu 68 aña di edad. Despues di a ricibi transplante di riñon, el a bay biba na ciudad di Tilburg na Hulanda. Ta na Hulanda mes el a ricibi su estudio avanza, y despues a bin traha na Aruba, y despues a bira un vocero hopi activo pa e compania cu ta produci awa y electricidad.
Na su famia, amigo, ex-coleganan, DIARIO ta manda su mas profundo palabra di condolencia.
