‘E Bruha Bruha’ a gana Kadushi di Oro di Krioyo Film Festival na Curaçao

ORANJESTAD (AAN): E pelicula ‘E Bruha, Bruha’ a gana e premio prestigioso “Kadushi di Oro” 25 di Krioyo Film Festival na Curaçao.

E anuncio tabata efectua pa Prome Minister Gilmar Pisas.

   E impacto di e pelicula Arubano aki di productor Desiree Croes, durante di Krioyo Film Festival 2025 na Curaçao, tabata grandi y e hurado a eligi’e e miho pelicula di e festival.

   Banda di e pelicula di aña, ‘E Bruha, Bruha’ a logra tambe e premionan di miho actris di reparto y tambe miho director. E miho actris di reparto tabata Yvonne Tromp pa su rol di e wela “Dudu” den e pelicula.  Desiree Croes a bira e miho director di pelicula largo.

   Na nomber di e produccion completo di Berea Production, inclui tur actor y productor, Desiree Croes, orguyoso director ganado, ta gradici pueblo di Aruba y di Curaçao, sin lubida gruponan na Hulanda cu a honra nan cu e bishita na e pelicula. Danki tambe na prensa di Aruba incluyendo Telearuba. Mas cu 2.000 Arubano a bishita pa mira e pelicula den cinema.  Tambe danki y pabien na Semi Chahmi y su crew pa e excelente trabao efectua.

   ‘E Bruha, Bruha’ ta e di 12 pelicula produci pa Desiree Croes y ta di dos biaha cu e premio Kadushi di Oro ta bin Aruba. E otro tabata aña pasa pa e pelicula ‘E Berguensa’.

   ‘E Bruha, Bruha’ ta un storia largo saca for di e buki di Desiree Croes titula “No Mas” y ta trata di e lucha di tres dama, mama, yiu y wela, contra e malbado director di Parke Nacional cu kier kita nan cas di cunucu for di nan y asina combertie den Airbnb.