KRALENDIJK: Pa keda innovativo y sigui mehora e procesonan, recientemente na Aeropuerto Flamingo na Bonaire a instala kiosco self service y ‘Smart E-Gates’ (porta electronico inteligente).
Nan ta bay uza e aparatonan moderno aki pa cobra impuesto di turista y pa control di QR-code.
E aparatonan nobo aki ta percura pa un experiencia mas rapido y mas agradabel pa e bishitantenan. Banda di esaki nan ta reduci e chance pa fraude y eror humano. E team di Aeropuerto ta keda presente pa na un manera amabel yama e pasaheronan bon bini y pa yuda nan ora nan tin pregunta of ora nan mester haci declaracion online.
E pasaheronan cu tin un QR-code internacional di $75 paga, na un manera simpel via e ‘Smart E-Gates’ por scan nan QR-code y haya acceso rapidamente. E bishitantenan cu ya caba a haci nan declaracion online, pero cu ainda no por a haci e pago, por ehempel pa motibo cu nan no tin un carchi adecuado, of un credit card, e ora por acudi na e kiosconan self service.
Pa e bishitantenan cu tin un tarifa di excepcion di $10 of un exoneracion, nada no ta cambia ainda. Te ainda nan ta haya asistencia personal y nan ta mustra e empleado publico cu ta cobra e impuesto, nan documentonan di prueba cu ta pertenece na e tarifa di excepcion.
Diputado Weber a tuma e aparatonan nobo oficialmente den uzo. Tocante esaki el a bisa lo siguiente: “Cu e modernizacion aki nos ta pone un paso importante den direccion di cobranza innovativo y eficiente di impuesto. Nos ta percura pa menos eror humano y nos ta ofrece nos bishitantenan un experiencia unico y agradabel na nan yegada na Aeropuerto Flamingo y na Bonaire.’
