Aruba ta un pais bon prepara pa cualkier calamidad

Early Warning System (EWS) a wordo inaugura:

*Un proyecto financia cu fondo di Union Europeo

ORANJESTAD (AAN): Diahuebs mainta 20 di maart, Prome Minister Evelyn Wever-Croes tabata presente na e inauguracion di e Early Warning System (EWS), e sistema cu ta duna alerta ora ta trata di calamidad natural cu por wordo detecta di trempan. E sirenanan cu ta poni rond di Aruba ta duna e prome señal na esnan cu ta den e areanan di peliger.

            Prome Minister a expresa di ta sumamente contento di por tabata parti di e inauguracion aki, mirando cu na momento cu el a drenta gobernacion a haya un Bureau Rampenbestrijding cu no tabata haya e debido atencion di gobierno. Aki ta unda señor Rino Hermans a convence Prome Minister mesora cu mester pone atencion na e tema di "Ta bon prepara".

            Tambe Prome Minister a indica cu el a atende varios conferencia, encuentronan y seminarionan den Reino y na Nacionnan Uni, y e tarea number un cu bo ta siña ta cu na momento un calamidad dal, pa por recupera mas liher y bay bek na normalidad, bo mester ta bon prepara.

            E proyecto aki a wordo financia cu fondo di Union Europeo. Prome Minister te cu awor ainda ta Presidente di Overseas Countries and Territories Associations (OCTA), cu ta paisnan ultramar cu tin un relacion cu Union Europeo, pa asina accesa fondo. Prome Minister a splica cu su persona y señor Ady Thijsen na Hulanda como presidente di e comicion ehecutivo ta lucha hopi duro pa por logra pa islanan manera Aruba haya mas fondo.

            Tambe Prome Minister a indica cu institutonan na Aruba mester aplica pa e fondonan cu ta wordo ricibi di Union Europeo. E ta un proceso un poco complica pero e ta necesario mirando cu e fondonan aki ta yuda pa por cumpli cu e proyectonan importante pa pais Aruba manera esaki.

            "Finalmente, pasando e antorcha pa e gobierno nobo, mi ta bay cu un curason trankil y un orguyo grandisimo di ta lagando atras un Crisis Management Office (CMO) bon prepara. Mi ta hopi orguyoso di señor Hermans y su ekipo completo pa tur e trabou duro cu nan a bin ta eherciendo y mi ta deseanan hopi exito. Nos a demostra cu como pais chikito nos por logra hopi si nos ta uni. Pami e ta un honor di por a contribui na empodera nan y enforsa na haci e fundeshi mas fuerte pa nan por sigui yuda Aruba bay padilanti”, Prome Minister a indica.