Analisis di e realidad mundial ta conduci na un solo conclusion --- “Tot nader orde” ningun trahador ta na haltura kico e lo come --- Importante ta pa bay averigua pakico e salarionan aki a subi
ORANJESTAD (AAN)- Kico ta pasa cu e sindicatonan na Aruba? Of miho bisa e grupo di sindicatonan cu kier forsa Pueblo di Aruba pa sigui paga placa cu Aruba no tin?
DIARIO ta analisa y sigui analisa e desaroyonan sindical na Aruba, cu ta wordo menasa cu destruccion economico, financiero y social.
Awe pa yega na un conclusion, nos mester para keto na tres palabra cu den mundo politico sigur a bini dilanti pero a duna prueba di no ta wordo comprende.
“Tot nader orde.” Traduci na Papiamento, esaki ta nifica: “Te proximo aviso.”
Pues mientras Gobierno no dicidi otro, e salarionan cu trahadornan di Gobierno ta baha cu 12.6 porcieto.
Pues aki no ta trata di un asunto permanente, pero di un asunto cu por dura di un luna pa un siglo.
Cu otro palabra, no ta eternamente ta bisa cu e salarionan aki ta keda asina. Pues e salarionan por subi den futuro.
Loke sigur ta di lamenta ta, cu e sindicalistanan no ta acepta e invitacion pa sinta na mesa pa yega na un acuerdo cu Gobierno, cu ta uza placa di Pueblo y placa cu ta wordo kita tambe for di trahadornan den comercio, cu mester a sigui paga belasting.
Si trahadornan den comercio, cu a perde mas cu 12.6 porciento di nan entrada, no paga belasting no tin placa pa paga e trahadornan di Gobierno.
Pero esaki aparentemente no ta asunto di e sindicalistanan cu kier forsa Pueblo lomba contra muraya.
Ora e salarionan tabata subi, ningun hende a habri boca. Pasobra ta aumento di e salarionan a haci, cu Aruba awe mester baha salarionan den un situacion cu placa a caba.
Ignorancia di e sindicalistanan cu ta tene accion ta bini dilanti. Ignorancia pasobra un hende cu ta na haltura kico ta pasa na e mundo aki, sigur mester tene na consideracion cu na momento aki ningun hende ta na haltura kico lo pasa na 2022.
Mundo ta biniendo abou. Aruba a sobrevivi pasobra Hulanda, cu ta wordo considera uno di e paisnan mas rico na mundo, a yuda Aruba mantene su mes riba pia.
Awe Hulanda ta den problema serio. Henter mundo ta den problema serio. Pero esaki e sindicalistanan no por comprende.
Sindicalistanan no conoce e palabra pandemia. Nan no conoce e responsabilidad gubernamental.
For di prome momento Gobierno a bisa cu ta “tot nader orde”. Esaki ta haci pues cu ora situacion cambia, por sinta na mesa y discuti con trahador di Gobierno y trahador di comercio, mescos cu e persona sin trabou, por tin mas entrada.
Lidernan sindical por mira den un bola di cristal. Ora bienestar di Aruba wordo destrui, nan por hala atras. Nan por haci manera nan no ta na haltura y hasta exigi Pueblo sigui paga nan salario pasobra nan por destrui Aruba.
Aruba cu mester a solucion un crisis financiero, for di 2021 ta biba den un situacion cu e mester lucha contra un enemigo invisibel y desconoci cu a destrui Aruba, cu a cera porta di economia di Aruba.
Pero e bola di cristal di sindicalistanan no ta permiti nan mira lagrima di e mama y e tata cu a perde trabou den sector priva.
Un abuso ta wordo comete contra Aruba.
Prome Ministro Wever-Croes a pidi pa sinta na mesa busca un solucion. Mira con por yega na un solucion “tot nader orde”, pues te ora Aruba sali for di problema.
Awe Aruba mester ta papia di e forma con e proyectonan pendiente ta yuda Aruba sobrevivi tur loke ta na caminda. Ta evita cu trahadornan den sector priva no ta haya nan mes den problema si negoshinan cera.
E negoshi di Gobierno nunca ta cera. Esaki ta e problema. Pasobra Gobierno semper lo tey na un pais democratico, caminda placa di Pueblo ta na wega den accionnan di un man yen di hende di sindicato cu ta uza un bola di cristal pa yena cu egoismo alcansa loke nan kier.
