Companianan di barco den exterior tambe pendiente di proyecto --- Facilidadnan pa bunker por aumenta trafico di barco pa Aruba --- Costo di bida y pa negoshi lo baha y atrae mas negoshi pa e pais
ORANJESTAD (AAN)- Uno di e informacionnan cu mas tabata wordo sigui dor di companianan cu ta depende di energia y di mundo di transportacion maritimo den e region, ta e desaroyonan di e negociacionnan entre Aruba y e compania Eagle LNG.
Manera DIARIO a anuncia den su edicion di Diasabra, informantenan importante den exterior y na Aruba a indica cu e acuerdo entre Aruba y Eagle LNG ta cla pa firma.
Esaki ta encera cu ta wordo spera riba plataforma internacional tambe, cu prome cu final di 2021, Aruba lo tin un acuerdo firma cu Eagle LNG pa distribui gas den e region di Caribe pero tambe pa otro factornan cu por transforma Aruba den un haf, caminda barconan por bin bunker gas cu nan ta uza como combustibel.
“E negoshi di gas na Aruba ta drenta un dimension sumamente importante. Na momento cu Aruba no solamente bira un centro pa distribui gas pero tambe un haf caminda e barconan por bunker, e pais lo por spera mas barco den su haf loke ta nifica mas actividad maritimo cu ta aumenta e base economico di Aruba,” informantenan a trece dilanti.
Den exterior e posibilidad cu barconan cu ta uza gas como combustibel por bunker na Aruba, ta di importancia de trafico maritimo, cu pa hopi tempo a expresa e deseo pa gas reemplasa e productonan di azeta cu barconan ta conoci pa a uza.
Barconan hasta a wordo construi cu posibilidad pa switch di azeta pa gas na momento cu esaki bira deseabel.
Informantenan clave a bisa DIARIO cu den e plannan di Eagle LNG pa habri facilidadnan na Aruba, e posibilidad pa Aruba bira un facilidad di bunker, pues caminda barconan por haya combustibel, tabata presente.
Esaki lo haci cu Aruba lo por conoce mas barco cu ta haci uzo di su facilidadnan maritimo y asina ta trece mas placa y mas actividad economico pa Aruba.
Manera DIARIO a relata den su edicion di Diasabra, e acuerdo entre Aruba y Eagle LNG lo ta cla pa firma y asina wordo ehecuta.
Pa Aruba e resultado lo ta, cu na momento cu WEB switch di azeta pa gas, e prijs di combustibel lo baha, loke lo nifica un prijs mas abou di awa y coriente.
E informacion aki ta wordo pasa na e momentonan aki tambe pa mundo di negoshi internacional, cu ta mira revision di plannan economico di companianan mundial debi na e impacto di Covid-19, cambio di clima y e prijs di petroleo.
Segun informantenan clave prome cu 2021 yega na su fin, Aruba lo tin un acuerdo firma cu Eagle LNG cu pues no solamente lo baha prijs di awa y coriente, pero lo trece actividad economico pa Aruba.
Manera a wordo indica na DIARIO, e recuperacion di Aruba ta depende di medidanan cu ta wordo tuma pa baha gasto di e pais pero tambe di e medidanan cu ta wordo tuma pa subi actividad economico.
E proyecto Eagle segun informantenan ta sumamente importante den e negociacionnan cu ta continua cu Quanten cu tin sosten di figuranan mundial clave relaciona cu cambio di clima.
Quanten lo kier opera a base di gas segun informantenan cu a indica cu December 2021 por bira e luna di informacionnan sumamente importante pa e recuperacion economico di Aruba cu asina lo tin forsa pa confronta e situacion mundial dificil.
