ORANJESTAD (AAN): Crisis Team ta indica cu considerando e aumento drastico di casonan di COVID-19 den cierto paisnan, a introduci un adaptacion di e sistema di Control y Mitigacion di e pandemia di Covid-19 na frontera.
Desde diasabra 4 di december 2021 ultimo a introduci e categoria di paisnan cu RIESGO HOPI HALTO. E siguiente medidanan lo aplica pa pasaheronan procedente di paisnan cu cay bao di e categoria aki:
- Pasaheronan cu no ta residente di Aruba no ta bay tin e opcion mas pa haci e COVID-19 test na yegada na Aeropuerto di Aruba.
- Pa tur pasahero, un PCR test mester wordo haci no mas tarda cu e dia prome cu e vuelo pa Aruba.
Como cu Hulanda lo ta un di e paisnan den e categoria aki, ta suplica tur hende cu lo ta viahando di Hulanda pa Aruba desde 4 di december 2021, pa tene cuenta cu esaki.
E pasaheronan aki lo mester haci nan PCR test mainta riba e dia prome cu nan vuelo pa Aruba, pa asina nan haya e resultado na tempo. Tambe mester tene na cuenta cu e medidanan nobo aki tambe ta conta pa studiantenan local cu ta desea di bin pasa nan vakantie na Aruba.
E regla nobo aki tambe ta bira aplicabel pa pasaheronan cu lo bin Aruba for di Hulanda via di un otro pais (por ehempel USA).
Pa e pasaheronan aki lo bira dificil pa cumpli cu e regla nobo pa motibo di e factor di tempo. Nan mester haci e PCR test un dia prome cu e viahe pa Aruba y upload e resultado negativo riba e sistema di ED Card prome cu biaha. E pasaheronan aki lo mester tene cuenta cu esaki na momento di planea pa viaha.
- Pa loke ta pasahero residente, nan tin e opcion pa haci e PCR test na yegada na Aruba. Sinembargo si nan opta pa haci e test na Hulanda, e test mester wordo haci e dia prome cu e vuelo pa Aruba.
