E ausencia di actividad di e Zona di Convergencia Intertropical

Uno di e factornan cu a contribui na calor durante September - *E fenomeno tras di yobidanan pisa sorprendente di Mei pa November  -  *Cu Teresa y Victor den formacion, Wanda por por cera alfabet na 2021

ORANJESTAD (AAN): Calor intenso ta e realidad na Aruba. Un calor, provoca sigur pa un temporada hopi activo di horcan pa e region Atlantico, na cual Aruba ta pertenece.

Aruba mescos cu tur pais cu ta forma parti di region di Caribe, Golfo di Mexico y e costa Oost di Merca, ta basa su mes riba informacion y trabou basico di National Hurricane Center di Merca, cu ta traha den cooperacion directo cu tur Servicio Meteorologico den e regionnan menciona pa asina por scapa bida cu accion dirigi den e temporada di mayor posibilidad pa impacto peligroso di naturalesa.

Na 2021, uno di e aspectonan cu ta bini dilanti den e region na cual Aruba ta pertenece directamente, ta e falta di actividad di e Zona di Convergencia Intertropical.

Riba portretnan di satelite, e falta di presencia di e zona ta visibel debi na e falta di presencia di nubianan cu ta caracterisa e zona aki pa medio di awasero pisa, strena y lamper cu por sorprende Aruba.

Si tene cuenta cu nubianan Cumulus Nimbus, cu ta ocasiona yobida pisa y strena y lamper, ta ocasiona tambe biento fuerte, por conclui cu na 2021 te awor actividad di Zona di Convergencia Intertropical a keda hopi limita na Aruba y e region na cual Aruba ta pertenece.

Cambio por bini cualkier momento ya cu October ta e luna mas conoci pa actividad di ITCZ (Intertropical Conversion Zone), caminda bientonan ta uni y convergencia ta produci yobida y strena y lamper.

Pa Aruba e actividad di e zona ta percura tambe pa reduci e calor intenso di temporada di horcan, cu ta sistemanan pisa di tempo cu ta atrae e dinamismo natural.

E trayecto cu mayoria di sistemanan a cubri den e biahe di Africa pa America, a haci cu e Zona di Convergencia Tropical no a bini ariba y uni su mes na e actividadnan di sistemanan tropical.

Hopi ola tropical a pasa den vecindario di Aruba pero no a activa e ITCZ cu na Maart normalmente ta cuminsa “subi” for di continente pa for di Mei te November pasa riba Aruba y sigui bay ariba.

Despues e actividad ta cuminsa baha atrobe.

Den e temporada di cambio di aña, tempo na Aruba ta wordo influencia pa loke ta trata yobida, dor di sistemanan friu cu ta baha for di costa Mericano pa subi Oceano Atlantico di pabao. Ora nan ta Noord Oost di Aruba, biento ta transporta e nubianan di yobida di fin di aña pa e region di Aruba.

Ora mira e portretnan di satelite cu ta indica condicionnan di tempo riba Oceano Atlantico, ta mira presencia di e horcan peligroso Sam, pero tambe dos sistema den formacion, cu ta Teresa y Victor.

Riba e grafico cu ta duna indicacion di loke lo pasa dentro di cinco dia, ta mira dos sistema cu ta bini tras di Sam, cu como horcan peligroso ta pasa pa Noord di region di Caribe.

E dos sistemanan aki, cu te na momento di redaccion di e articulo aki ainda tabata ola tropical, ta wordo spera di sigui desaroya y posibelmente haya e nombernan di Teresa y Victor mientras nan ta crusa Oceano Atlantico.

E posicion mas abou cu nan ta mantene ta coresponde cu e realidad cu na fin di temporada sistemanan tropical ta biaha mas abou y tambe na forma eratico.

E dos sistemanan aki ta rondona cu actividad y por mira claramente riba portret di satelite cu nubianan cu ta marca actividad di e Zona di Convergencia Intertropica, ta presente despues di un condicion di tempo sumamente seco.

Ayeratardi Sam tabata move NoordWest mientras cu e tabata prepara pa cuminsa bay Noord.

Riba portret sinembargo por a mira, con el a cuminsa activa e Zona di Convergencia Intertropical riba Venezuela.

DIARIO ta sigui tur desaroyo pa asina informa Aruba.