ORANJESTAD (AAN): Den su prome 4 dianan di trabao como minister di Enseñanza y Deporte, Endy Croes a logra reuni caba entre otro cu Simar, Directie Onderwijs, Dienst Inspectie Onderwijs, Universidad di Aruba y EPI.
Esaki ta algun di e serie di reunion cu lo continua, segun Croes.
E mandatario a indica cu asina lo haya un bon bista riba henter e tereno, proponiendo caba kico ta e deseo y e direccion den cual su ministerio kier bay.
“Den e prome reunionnan semper mi a papia di inclusion, pues pa nos tur mira den e mesun direccion”.
No obstante di e hecho cu nos ta reuniendo cu diferente stakeholder y departamento, nos a encontra riba nos lessenaar un cantidad di reto, esta problemanan pa resolve.
Mi ta kere cu ora cu tin problema bo tin cu purba soluciona esakinan, pa bo por traha den trankilidad y di eynan sigui cu bo vision cu tur e stakeholders, pa bo por ta exitoso, segun e mandatario.
El a sigui bisa cu tin algun punto di prioridad cu tin mester di atencion, di cual uno ta e instructornan di landamento cu ta pasando den un dilema.
E minister a indica cu mirando esaki el a tuma contacto cu DRH y dentro di poco e lo haya e conseho final y cu e lo sinta bek cu e sindicato corespondiente pa haci cierto proposicion y trata na tur manera pa e proximo pago di otro luna por ta regla na un bon manera, pa nan keda contento y satisfecho.
Otro punto importante cu tin cu haya atencion ta e problema di e werksters (trahadornan di limpieza) y pesey e siman aki e mandatario su intencion ta pa sinta cu SKOA y bin cu un proposicion pa forma un comision y den 30 dia bin cu un solucion structural.
“Nos ta studiante e problematica aki, nos ta comprondiendo esaki y mi ta kere sigur cu un comision cu un representante di SKOA, uno di ministerio, uno di Finanzas y nos por trece tambe un experto externo pa forma un comision di 5 y pidi nan pa den 30 dia repasa entre otro e leynan y e veredictonan, pa bin cu un conseho final pa na un manera masha elegante nos por bin cu proposicionnan cu ta sostenible tambe y asina atende cu e problema aki”, segun Croes.
El a indica cu otro problema pa atende cune ta OAA, cu ta e Openbare Avondleergangen Aruba, unda cu e seccion ey no a cuminza ainda.
E minister a splica cu ta wardando riba algun conseho ainda, pa despues yama e gruponan aki aden y tuma decisionnan structural corecto pa por kita esaki tambe for d caminda.
“Un otro problematica cu tin ta e asunto di e alrededor di 35 alumno cu no por cuminza scol na EPB te cu aworaki, pa motibo cu no tabata tin fondonan disponibel pa e maestronan por habri extra klasnan pa duna extra les”.
Ya caba mi a pidi nos coordinador di presupuesto pa haci un sondeo den nos propio presupuesto y mi a scucha cu tin 90% chens cu dentro di algun dia lo yega na un acuerdo cu e stichting pa pone e fondonan aki disponibel y habri e klasnan.
Mi ta priminti comunidad y e mayornan cu ta pendiente, cu entre awe cu mayan esaki lo wordo resolvi, segun e minister.
El a indica cu ta trahando tambe riba un problema nobo, unda cu Hospital a kibra nan protocol di cooperacion cu EPI.
Pesey el a papia caba cu minister di Salubridad Dangui Oduber y muy pronto nan lo sinta hunto pa busca un solucion rapido pa esaki.
Croes a splica cu e ta trahando tambe riba e reto di infrastructura di e scolnan, unda cu entre otro mantencion di e scolnan ta exigi hopi fondo.
