ORANJESTAD (AAN): E compania di The Salamander Group ta haci donacion di un porcentahe di su bentanan na programa Tikkun Olam, Repair of The World.
E fondonan colecta anualmente ta wordo duna na organisacionnan sin fin di lucro local den un esfuerso continuo pa haci bon y sirbi comunidad. E programa aki ta andando desde 2007.
E biaha aki cinco fundacion a ricibi donacion hunto for di Salamander Group. E fondonan p'e donacion a wordo genera pa e compania su programa unico Tikkun Olam. Esaki ta un nomber basa riba filosofia Hebrew unda e creencia ta cu reparacion di mundo por ta posibel pa medio di actonan di caridad.
Fondonan colecta den e cuater tiendanan tur aña y donacionnan ta presenta na comienso di cada aña na un fundacion particular.
E aña aki a toca Telefon Pa Hubentud, Koningin Wilhelmina Kanker Fonds, Mary Joan Foundation, Fundacion Contra Violencia Relacional, y Fundacion Autismo Aruba.
Tikkun Olam su programa sosteni pa henter e staf di curason. E fondonan ta keda genera den colaboracion cu clientenan y haci posibel danki na staf cu ta yuda cu un porcentahe directo di bentanan di cliente na fundacionnan local, escogi for di un menu di Tikkun Olam obtenibel den e tiendanan.
Clientenan por studia e menu na checkout y kies pa duna un porcentahe di benta na nan Fundacion di preferencia. P'e aña aki su presentacion, fundacionnan a wordo pidi pa comparti e retonan cu nan ta enfrenta, y mayoria di nan ta raporta cu fondo ta loke ta hopi duro pa yega na dje, anto e necesidad ta sigui crece.
