E aliansa entre Do It Center y Grupo Exito ta bay trece proyectonan grandi pa Aruba

Frans Ponson

ORANJESTAD (AAN): Diabierna anochi a tuma lugar apertura oficial di departamentonan di 'houseware' y Health and Beauty Boutique di Do It Center.

Señor Frans Ponson, gerente di Do It Center a splica cu esaki sigur tabata un momento hopi grandi pa e compania, y sigur uno hopi anticipa pa clientenan di Do It Center, pasobra e beneficionan ta sumamente atractivo y lo trece alivio pa hopi cartera na Aruba.

Ponson a splica cu e aliansa entre un grupo asina grandi cu un isla asina chikito ta algo hopi special, specialmente pasobra Aruba ta e prome pais cu Grupo Exito a forma un aliansa estrategico pafor di Colombia.

El a agrega cu tin hopi mas cambio grandi na caminda, proyectonan cu a cuminsa chikito cu Exito, a crece na proyectonan hopi mas grandi pa Aruba.

Ponson a enfatisa cu nan meta no ta pa haya tur cos bao di un solo dak, pero tambe ofrece prijs hopi mas accesibel bao di un solo dak y nan lo sigui pusha pa brinda Aruba e mihor prijs y mihor calidad.    

Veronica Garcia, directora di Aliansa Estrategico di Grupo Exito a bisa cu Aruba por spera di nan e miho marcanan, productonan di calidad excelente y sigur miho prijsnan. Nan ta hopi orguyoso cu e aliansa aki, pasobra nan por ofrece na pueblo di Aruba, marcanan hopi conoci na Colombia, cu sigur lo wordo reconoci pa Arubianonan cu sa bishita Colombia. El a agrega cu nan a trece un variedad grandi di producto, entre articulonan pa cas, comestibel, paña y productonan beyesa. E ta super contento cu e acogida tabata asina grandi y positivo. E prome container a yega 3 siman pasa y den 3 dia, por lo menos 20 porciento di esaki a wordo bendi. Esaki ta mustra cu clientenan di Do It Center a reconoce nan marcanan y nan ta hopi orguyoso di esaki.

Garcia a probecha pa gradici famia di Do It Center pa cera e aliansa strategico aki y nan ta contento cu Aruba a bira e prome pais cu nan ta exporta nan productonan internacionalmente. 

Frans Ponson a anuncia cu nan a wordo bendiciona cu Grupo Exito y tin plannan pa habri un Exito WOW na Aruba. Nan tin un proposicion aden cu gobierno pa habri esaki pariba di brug. Esaki ta nan meta pa habri un combinacion di Do it y Grupo Exito, cu mesun bon prijs y variacion di mercancia, cu un edificio grandi pariba di brug.