ORANJESTAD (AAN): Con importante e conocemento di duna prome auxilio ta pa un ser humano?
Algun pais grandi ta obliga alumnonan di 13 aña di edad pa ricibi les di esaki y tambe CPR na scol. E idea ta pa purba na trece e conocemento aki cerca mas persona.
Esey ta loke Johan Richardson tambe ta opina! Johan Richardson cu awe ta doño di su mes un negoshi Zenith Quality Services, a paga un curso pa muchanan di 6e klas di Pius X School na Dakota pa haya un curso di CPR.
Johan ta un ex-alumno di e scol aki, y den un entrevista el a splica cu e iniciativa a bin debi cu el a nota cu hopi mucha ta na cas nan so cu nan mayornan, y inespera algo por socede cu e mayor y bira malo.
Ora algo socede, e mucha no sa kico pa haci y no por realmente yuda e mayor e momento ey. Pesey el a pensa cu un entrenamento di CPR, bo ta prepara e hobennan y si acaso un emergencia socede na cas of riba caya, nan por tuma e accion corecto.
Johan a dicidi na ofrece e curso aki na muchanan di 6de klas, esta hobennan cu tin 12 pa 13 aña cu mentalmente ta birando mas fuerte, y el a escoge pa duna nan e curso aki.
E curso di CPR ta uno importante, pasobra si bo imagina cu bo ta un mucha di 12 aña y diripiente bo mama a bira malo, y bo no tabata sa kico pa haci. Ata e mama a fayece, e ora e mucha lo sinti su mes responsable y biba cu un trauma.
Pesey ta nada mihor cu prepara un mucha, esta cu si algo pasa, e por sa ki paso pa tuma pa trata na rescata un hende.
Mescos cu les di landamento ta importante, les di trafico ta importante, corda cu les di CPR tambe ta importante cu ta yudabo prepara e mucha pa asina e por tuma pasonan adecuado ora cu un emergencia socede.
Su compania a patrocina Pius X School pa haya e curso aki. E ta spera cu lo por tin otro comerciante cu tambe por patrocina otro scolnan pa asina nan tambe haya CPR les. Sigur e muchanan aki haya sa di CPR, nan lo conta nan famia, amistad, y muchanan, y kizas asina e grupo ta bira mas grandi.
Kizas aki 5 pa 10 aña, kizas ta henter Aruba lo por haci CPR.
E lesnan di CPR a wordo duna door di John Tromp di ImSan.
