ORANJESTAD (AAN): Departamento di Salubridad Publico di Aruba, den fin di siman a confirma cu nan tin dos caso di posible Bruela di Macaco bao vigilancia riba e isla.
Segun DVG, e di dos a presenta mientras cu ainda nan ta wardando riba confirmacion di RIVM Hulanda riba testnan haci anteriormente.
Hecho ta cu awor, Aruba tin un caso cu un resultado positivo preliminario y un otro caso sospechoso di Monkeypox bao investigacion. Ta trata aki di 2 caso relata na otro.
Autoridadnan di Salubridad Publico a percura pa e personanan ta den isolacion y ta wordo guia pa personal di seccion di Malesanan Infeccioso di DVG.
Mientras tanto na isla di Curaçao tambe a detecta un posible caso di Bruela di Macaco. Esun na Curaçao, a haya resultado positivo pa dos test haci cune.
Sintomanan di Bruela di Macaco: Un persona contagia cu e virus di Bruela di Macaco lo experencia sintomanan manera entre otro keintura, dolor di cabez, cansancio, kliernan hincha y rash cu despues di algun dia ta habri na blaar cu pus na diferente parti di e curpa, pero mas tanto ta concentra riba cara, man y pianan.
Contagio cu e virus aki ta sosode di hende pa hende pa medio di contacto directo cu un persona infecta. Esaki por sosode ora cu tin contacto cu e likido procedente di e blarnan presente cerca e persona contagia y posiblemente tambe pa medio di particulanan (droplets) cu ta sali for di e boca/garganta of nanishi di e persona contagia.
Tin indicacion cu Bruela di Macaco por wordo transmiti tambe sexualmente, pero esaki no ta comproba ainda.
Hecho ta cu tur hende por por keda contagia cu Monkeypox sin discrimina sexo, edad, religion, cultura, raza of orientacion sexual. Pero segun data di casonan internacional na e momento aki mayoria caso 98% ta bou grupo di hende homber cu tin relacion cu persona di mesun sexo.
Pa e motibo aki cu e grupo ey ta esnan cu mas riesgo na e momento aki, pa cual motibo ta importante cu nan ta bon informa pa por ta mas conciente y por proteha nan mes.
Pa evita contagio cu Monkeypox ta recomenda pa tur hende evita di tin contacto hopi cerca cu hende cu ta sinti malo. Cu contacto di cerca ta referi atrobe na por ehempel cara cu cara, cuero cu cuero, sunchi, braza, caricia y mantene relacion sexual.
