Huicio di Benny y hopi cara conoci di AVP ta gasto enorme pa Aruba
*Autoridad lo a atende cu neishi di crimen y paranda paga den Gobierno
*Ceremonia Aña Parlamentario nobo ta inclui acusado mayor Benny
ORANJESTAD (AAN) — Kico ta pasa cu placa y propiedad di Aruba? Mientras Gobierno Wever-Croes, CaFT, Gobierno Hulandes, Gobierno di Reino ta trata na yega na un areglo pa Aruba conoce un futuro financiero cu ta brinda ciudadanonan seguridad, September 2022 lo presenta dos situacion den cual placa di Aruba lo wordo discuti na un evento di gala di Parlamento y den sala di Corte.
Benny Sevinger lo hunga un papel importante dia 12 di September 2022, ora durante un ceremonia oficial, Gobernador di Aruba como representante di Rey, realisa e apertura di e aña nobo di Parlamento, representacion oficial di Pueblo di Aruba.
Na e ocasion aki, Gobernador lo presenta e plannan di gobernacion di Gobierno y asina lo entrega e prueba di mas grandi cu Parlamento ta e centro di proteccion di bienestar di Pueblo y tur loke ta pertenencia di Pueblo.
Benny Sevinger, kende ta wordo paga cu placa di Pueblo pa sirbi e interes di Aruba y pa controla tur loke Gobierno haci y asina evita cu crimen por destrui bienestar di Aruba, lo mester ta presenta na e acto ceremonial y hasta mester ta dedicando tur su tempo pa mira con ta atende cu e situacion mundial cu ta menasa bienestar di Aruba tambe.
Mientras por spera cu Benny Sevinger lo ta presente pa e occasion, informantenan den diferente sector cu kende DIARIO a papia pa por trece e articulo aki pa Aruba, ta puntra nan mes cuanto atencion Benny Sevinger por tin pa haci e trabou pa cual como Parlamentario den servicio completo di Pueblo, e ta wordo paga.
Na momento cu Gobernador habri e aña nobo di Parlamento dia 12 di September, ya Huez lo tin un siman ta atende e caso penal, den cual Benny Sevinger ta wordo acusa di falsificacion di documento, estafa (ladronicia), abuso di poder, acepta placa bou mesa, laba placa den Corte di Husticia.
Mientras sala di Parlamento como centro di Representacion di Pueblo ta wordo prepara pa e reunion anual cu ta suscribi importancia y dignidad di Parlamento di Aruba, den Corte di Husticia e cara di Aruba ta wordo destrui cu casonan presenta dor di Husticia contra entre otro algun miembro di e e grupo elitario di AVP, cu Benny Sevinger como figura central.
Tin e caso contra Benny Sevinger directamente. E ta wordo mira como e figura central den un fiesta di placa cu tereno di Aruba.
Pregunta grandi ta, cuanto tempo Benny Sevinger por a dedica su mes na su trabou den Parlamento pa cual el a wordo paga dor di Aruba despues cu su partido AVP, dirigi pa Mike Eman, a impone presencia di Benny Sevinger den Parlamento, cu ta cara di Aruba?
Pa loke ta trata e proximo lunanan aki Benny Sevinger lo mester dedica su atencion completamente na casonan den cual bienestar di Aruba a wordo destrui si e acusacionnan ta berdad, mescos cu casonan di ladronicia di interesnan di Aruba, placa cu a lora bou mesa, placa pa celebra fiesta di “Happy Birthday” di Benny den Hotel, placa pa drecha cas di Benny Sevinger.
Mientras tur esaki ta tuma lugar, como Miembro di Parlamento di Aruba, Benny Sevinger mester haya tur informacion di Aruba y tin poder pa participa den tur discusion financiero di Aruba y hasta exigi di personal di Gobierno pa duna su persona tur informacion (financiero y di tereno inclui) na su persona.
Ademas den representacion oficial di Aruba mester reconoce Benny Sevinger como parti di e gobernacion total di Aruba.
Asuntonan serio ta na discusion den e ultimo lunnan di 2022, pora mester bini dilanti cuanto placa Aruba a perde den transaccionnan di tereno contra Ley ora placa a lora sgeun acusacionnan entre Benny Sevinger y e grupo elitario di AVP.
Informantenan clave di tur sector di Aruba ta sumamente preocupa cu e imagen di Aruba na e momentonan aki ya cu ta trata di hendenan conoci den exterior y un ex mandatario, politico activo y actual Miembro di Parlamento den loke autoridad a investiga como un neishi di crimen y hasta paranda pa hasta celebra cu edad di Benny Sevinger a subi.
DIARIO ta sigui tur desaroyo pa presenta nan na Aruba.
