Autoridad competente mester atende cu otro aventura di Mike Eman
*Bofon a haci di Aruba ora a baha BBO sin estudio y investigacion
*Reforma fiscal actual mester coregi weganan politico cu impuesto
ORANJESTAD (AAN) — Cambio maneho di belasting, ta wordo yama “reforma fiscal” pues reforma di belasting, cu ta placa cu cual mester paga pa e funcionamento di un pais.
Pa un pagador di belasting ta sona masha bunita cu Mike a baha BBO. No ta para keto na e realidad cu Mike a cambia e sistema di belasting cu ta crea placa pa yuda hende sin entrada, pa percura pa e pais funciona, pa percura cu avionnan por baha, pa percura cu muchanan ta haya les, pa percura cu tin caretera y asina nos por sigui.
Pio ainda. E forma cu e cambio a tuma lugar, no a bay cu e preparacion necesario pero ta parce mas un aventura di cinco strea sin bon estudio y sin e preparacion debido cu mester a tuma lugar.
Mike no por a deshaci di henter e BBO pasobra Aruba lo a zink si esaki a socede y manera Mike mes a splica na su forma di “bon amigo” na 2010. Pa Mike por a deshaci di BBO, manera el a priminti, e lo mester a bolbe subi tur belasting cu a baha ora e introduci BBO.
Na 2006, e situacion financiero mundial tabata den problema mescos cu awe. Por a papia di recesion, cu ta caida di e sistema financiero cu a afecta tur parti di mundo, incluso Aruba.
Gobierno Nel Oduber a introduci BBO, cu DIARIO tampoco a gusta pasobra e ta hisa prijs cu cada compra of servicio.. DIARIO tabata na favor di un Sales Tax.
Introduccion di BBO tabata un reforma di belasting, pasobra pa BBO drenta na vigor, a baha otro tipo di belasting manera impuesto riba sueldo y impuesto riba ganashi.
Pues a baha loke ta yama “belasting directo” manera loonbelasting y winstbelasting y a introduci BBO cu como belasting indirecto ta genera mas entrada pa Gobierno.
Nos tin tur prueba cu Mike Eman ningun momento a studia y investiga na forma apropia kico e resultadonan di kita of baha BBO pa e caha di Aruba lo tabata.
Pues wowo cera, sin sa di kico e tabata papia, Mike a lansa e promesa di eleccion cu e ta baha BBO prome cu mitar y despues ta deshaci di BBO.
Naturalmente e mester a gana eleccion cu e promesa di baha belasting, sigur si e no a bisa Pueblo cu e no tabata sa kico e ta papia manera ta bini dilanti den documentonan cu ta mustra cu Mike, no a studia e materia manera mester ta.
Pa Mike papia di poder di compra na 2009, e tabata uza cifranan di 2006, cu ta causa risa di tur hende cu tin conocemento di cifra.
Pa completa obra ta FESCA di AVP mes a traha un estudio di forsa di compra, sin a atende cu instancianan oficial y den e caso aki sigur Conseho Social Economico.
Deshaci di BBO tabata un aventura di Mike di mes caliber cu e aventura di Citgo entre otro, pero cu ta completamente contra Ley cu ta exigi pa un gobernante no permiti ningun riesgo pa e pais ora e cambia un ley.
Na momento cu Mike Eman na 2010 a baha BBO na mitar, algo serio a pasa. Pa motibo di introduccion di BBO, Aruba no tabata ricibi cierto sumanan di e belastingnan directo cu a baha ora a introduci BBO, pero cu Mike no a bolbe subi ora el a scrap BBO.
Si Mike a deshaci completamente di BBO, e lo mester a subi tur belasting directo na 2010 atrobe.
Aruba, na 2009 ya a haci un prestamo di casi 100 Miyon pa por cubri su gastonan riba presupuesto.
Ora Mike a baha BBO, Aruba a keda sin entrada di e BBO pero tambe sin e entrada di e belastingnan cu a baha pa BBO, loke ta nifica desaster, cu awe ta presenta su mes na Aruba cu ta victima di un cadena di decision popular entre 2009 pa 2017.
Awor kico? Ley mester papia. Ley cu ta prohibi un gobernante, crea riesgo pa un pais. Ley cu ta prohibi un gobernante, hinca e pais den un aventura financiero.
Aruba tin tur prueba y tur documento pa actua na momento cu bofon a wordo haci di Aruba, cu awe ta den un desastre financiero ocasiona pa e debe nacional di Mike cu na mes momento a destrui e entrada nacional di Aruba.
