Pesey hopi hoben kier habri negoshi awor! - ORANJESTAD (AAN): Manera DIARIO a trece dilanti caba e siman aki, e organizacion di Qredits a yuda comerciantenan local na forma pro-activo durante pandemia di Coronavirus.
Ya ta cuatro aña caba cu Qredits ta estableci na Aruba y yudando varios empresario cuminza cu nan idea pa el a bira realidad.
Qredits mes a start na Hulanda den aña 2009, y e tabata un idea di e hulandes Elwin Groenevelt. E tabata presente e siman aki ora cu nan a muda pa un localidad nobo den Bilderdijkstraat na Playa.
Segun Groenevelt, ora cu el a cuminza cu Qredits na Hulanda, mescos cu tur otro hende nan tambe a start cu ‘nada’. Asina pues Qredits a cuminza hopi chikito, y esey ta loke ta hacie bunita. Ta conoci cu e companianan di mas grandi, realmente ta cuminza hopi chikito.
Qredits a siña, a inverti, y aworaki nan ta conta cu 120 trahador na Hulanda, di cual 15 ta den Caribe.
Groenevelt a splica cu na aña 2015 nan a cuminza pensa cu tur loke nan ta haciendo pa empresanan na Hulanda, lo por wordo adapta y ofreci den Caribe. Pasobra e motibo pakico nan ta existi, ta cu hopi compania cu ta prepara pa lanta, ta haya guia con pa haci esey, y tambe ricibi capital pa traha cune. Pasobra ta conoci cu empresanan nobo y chikito ta pasa den dolor di cabez pa haya prestamo di banco. E ta un financiamento dificil y pesey hopi banco no ta duna esey facilmente.
Pa e motibo ey, na Hulanda e organizacion Qredits a lanta. Y asina a nota cu na e islanan den Caribe tambe, e companianan nobo ta pasa den mesun situacion. Tin banco tambe den Caribe, pero hopi compania nobo casi no por haya capital pa start cune.
Pesey Qredits a cuminza na 2015 ta duna servicio na Bonaire. Pa 2017 a bin habri na Aruba. Despues a cuminza traha tambe na St. Maarten y Curacao.
Segun Groenevelt, e ta haya bunita cu tur loke nan a desaroya na Hulanda, a logra wordo introduci na e islanan y cu tabatin gran necesidad pa esey. Por ehemplo na Aruba mes, cada biaha Qredits ta keda crece y crece. Ya caba a financia casi 300 comerciante, y hopi di nan a haya yudanza pa traha un business plan, pa asina desaroya ideanan pa bira un bon negoshante. Esey ta e mision y vision di Qredits.
Aki Groenevelt a indica cu pa futuro, e lo kier mira mas hende bira entrepreneur y habri nan propio negoshi. Awendia no ta facil pa bo haya un trabao, y bo lo no bay keda tampoco ta traha 40 aña largo pa e mesun negoshi. Antes si esey tabata asina!
Pero awor e asunto ey di traha asina hopi lustro pa un compania of den Gobierno, no ta wordo mira mescos. Esey kiermeen cu hopi hende, principalmente hobennan tin di cuminza cu un empresa riba nan mes.
E no ta referi aki pa mas hende habri negoshi di huur auto, of habri snacktrucks, etc. Segun Groenevelt, mester desaroya ideanan inovativo cu ta importante pa economia di e isla. Nan ta stimula hopi hoben pa cuminza cu nan mesun negoshi. Ta importante pa hobennan siña con pa lanta un negoshi cu ta produci ganashi y sostene nan bida.
Si e sigui asina, e ora den proximo diez añanan tur hende pro sigui crece, y sigur Qredits lo por yuda riba di 1.000 comerciante cu coaching y financiamento, y e ta pensa cu futuro ta mustra briyante.
