DVG ta celebra talento y responsabilidad durante entrega di premio di ‘Doño Responsabel’

ORANJESTAD (AAN): Directie Volksgezondheid (DVG) conhuntamente cu Ministerio di Salud Publico a celebra cu

hopi alegria entrega di premio na 12 ganadonan di e Competencia di Arte Escolar “Doño Responsabel”. E ceremonia a tuma luga diabierna 23 di october na Bestuurskantoor, unda e muchanan a ricibi reconocimiento pa nan creatividad y mensahe di amor pa nos animalnan.

   E 12 ganadornan a keda den nomber di: (*) Jayda Heidweiller di 1e klas Mon Plaisir School SN.  (*) Juan Vicente Rodriguez Quintero di 1e klas Sint Franciscus College.  (*) Jaiden Mathias Ayala Sigcha di 2e klas Colegio Hilario Angela.  (*) Jeremiah Jacobs di 2e klas Colegio San Hose.

   Tambe tin: (*) Mayaleah Rodriguez di 3e klas Colegio Bon Bini.  (*) Nathalia Becerra Pabon di 3e klas Colegio Frere Bonifacius.  (*) Alessa Semeleer di 4e klas Princes Amalia Basisschool.  (*) Scarlys Diaz Sanchez di 4e klas Princes Amalia Basisschool. (*) Anne-Mary Pereira di 5e klas Maria Goretti College.  (*) Sofia Buunen di 5e klas Princes Amalia Basisschool.  (*) Jobriel Lacle di 6e klas Maria Goretti College.  (*) Liane Geerman di 6e klas Colegio San Hose.

   E competencia a conta cu un participacion di 725 pintura di 17 scol basico, demostrando e entusiasmo di nos muchanan pa contribui na un Aruba cu mas cuido y responsabilidad pa mascotanan.

   Ganador absoluto: Durante e ceremonia, Sofia Buunen den 5e klas na Princes Amalia Basisschool a wordo anuncia como e ganadora absoluto. Su pintura lo wordo transforma den un mural riba e futuro Centro di Rescate y Control, como un simbolo duradero di cuido, proteccion y amor pa animalnan.

   DVG ta felicita tur e ganadonan y ta gradici cada mucha cu a participa. Cada pintura ta contribui na un mensahe comun: un mascota ta un ser bibo cu merece cuido durante henter su bida.

   Un danki di curason na e directornan, maestronan y mayornan pa nan dedicacion y apoyo. Un reconocimiento special ta bay na Colegio San Hose, Colegio Hilario Angela y Mon Plaisir School San Nicolas, e tres scolnan cu e participacion mas grandi. Naturalmente DVG a prepara un certificado pa gradici tur 17 scol pa nan participacion grandioso. Pa tur scol cu no a cay den premio DVG a prepara un premio di consuelo pa e miho pintura di e scol tambe.

   DVG ta invita comunidad pa sigui e ehempel di nos muchanan y transforma amor pa animalnan den accion, previniendo abandono y maltrato.  Planta amor, proteha nan bienestar y sea un doño responsabel.  Pa un comunidad harmonioso, un doño responsabel alabes.