Jennifer Arends-Reyes:
ORANJESTAD (AAN): Parlamentario di AVP, Jennifer Arends-Reyes, ta enfatisa cu mehoracion di poder di compra y e lucha contra pobreza mester sigui ricibi prioridad. E discusion tocante aumento di minimumloon y su relacion cu bestaansminimum ta toca directamente e bienestar di trahadornan y nan famianan.
“Nos a papia hopi di e necesidad pa mehora calidad di bida di nos pueblo. E compromiso ey mester sigui guia nos trabao. Ora un hende ta traha henter siman y toch no por cubri su gastonan basico, nos tin un responsabilidad pa busca solucion”, Jennifer ta expresa.
E minimumloon ta e salario minimo cu ley ta establece. E bestaansminimum ta indica cuanto un persona of famia, dependiendo di su composicion, tin mester pa cubri necesidadnan basico. Acerca e salario minimo na e nivel necesario pa biba ta un paso importante pa duna trahadornan mas siguridad.
Desde 1 di januari 2026, Aruba tin un minimumuurloon general di Afl. 11,58. E introduccion di pago minimo pa ora ta un paso importante pa un remuneracion mas husto, pero e discusion tocante suficiencia di entrada mester continua.
Pa Jennifer, e esfuerzo pa acerca minimumloon na bestaansminimum ta cuadra cu e compromiso social cu AVP a trece dilanti na varios ocasion pa mehora poder di compra y atende e dificultadnan cu famianan ta enfrenta pa yega fin di luna.
“Tras di e cifranan tin un mama cu ta calcula cuanto ta resta pa cumpra cuminda, un tata cu ta preocupa pa paga huur y trahadornan cu ta haci nan maximo tur dia. Nan esfuerzo mester traduci den un bida cu mas tranquilidad y perspectiva.”
Jennifer ta considera importante pa e trayecto conta cu pasonan cla, dialogo cu sindicatonan y empresarionan, y atencion pa e capacidad di empresanan chikito. Tambe mester evalua e efecto riba prijsnan y empleo, pa percura cu e mehoracion den salario realmente resulta den mas poder di compra.
“Dialogo y responsabilidad ta necesario pa yega na un solucion cu ta funciona. Na mes momento, nos mester mantene e meta cla y sigui avansa. E necesidad di nos trahadornan ta real.”
Jennifer ta reafirma su compromiso pa sigui impulsa e tema den Parlamento, cu atencion pa tanto entrada como costo di bida.
“E puntonan cu nos a defende mester haya seguimiento den nos trabao diario. Pa mi, progreso di Aruba mester wordo sinti den cas di nos famianan: den nan posibilidad pa cubri nan necesidadnan y construi un miho futuro.
