ORANJESTAD (AAN): E siman aki, e alianza di Dutch Caribbean Nature Alliance (DCNA) ta honra di por yama Prinses Beatrix bon bini
cu su bishita venidero na Bonaire y St. Eustatius den luna di November. E bishita lo ta den signo di naturaleza y comunidad, y ta acentua e lazo fuerte entre e comunidadnan di e islanan y nan patrimonio natural unico.
Durante su bishita, Prinses Beatrix lo haya sa mas tocante iniciativanan local di conservacion y restauracion. DCNA ta contento cu e ocacion special aki ta brinda un oportunidad pa destaca e trabao importante di e partnernan local di maneho di parke, Stinapa Bonaire y Stenapa St. Eustatius, cu ta hunga un rol di lider den proteccion y restauracion di e ambiente natural di e islanan.
“Nos ta orguyoso cu nos por ricibi Prinses Beatrix, y comparti e dedicacion y logronan di e hopi
organizacionnan cu diariamente ta traha duro pa proteccion y restauracion di e ambiente natural di nos islanan”, segun Arno Verhoeven, director di DCNA a declara. “E bishita aki ta un oportunidad balioso pa fiha atencion nacional y internacional riba e rol crucial di naturaleza pa comunidadnan y economianan, y pa e resiliencia di futuro.”
E bishita ta bay tuma luga tambe na un momento cu DCNA y su partnernan a lansa e Programa pa
Conservacion y Restoracion di e Habitatnan mas importante. E iniciativa di mas aña aki ta enfoca riba proteccion y restauracion di cinco ecosistema critico na tur e seis islanan di Caribe Hulandes: ref di coral, cama di yerba di lama, mondi di palo di mangel, mondi tropical seco y mondi tropical humedo. Pa medio di colaboracion, compartimento di conocemento y accion dirigi, e programa tin como meta pa garantiza cu e ecosistemanan aki ta sigui provee servicio esencial pa tanto naturaleza como hende.
Pa medio di trece e proyectonan aki bao di atencion durante bishita di e Prinses, DCNA y su
partnernan ta spera di inspira sosten continuo pa e esfuersonan di conservacion y restauracion den henter Caribe Hulandes.
