E ta dianan 10 pa 12 di November na Universidad di Aruba
ORANJESTAD (AAN): Cu e kick-off aki, DCDC-Network ta spera di conecta investigado, institucion, y profesional di Caribe Hulandes; Aruba, Corsou, St. Martin, Bonaire, St. Eustatius y Saba. Tur hende cu tin interes den dato habri, investigacion colaborativo, y crecemento di capacidad digital den nos region ta bonbini!
E idioma primario lo ta Ingles, pero ta posibel pa haci pregunta na Papiamento/Hulandes tambe. Por fabor inscribi prome cu 3 di november pa join (parti di) e conferencia. Por inscribi na:
dcdc.network/kickoff
Ta cuminza dia 10 di November cu e charla, di 6:00 pm te cu 9:00 pm. Sesion publico, apertura cu Minister di Relacionnan den Reino, Educacion, Hubentud, Innovacion y Deporte, Gerlien Croes. E sesion publico tin charla tocante DCDC-Network, privacidad di dato (Sandy Odor), AI, uza y accesibilidad di dato (Hadeikaye Peterson), y compartimento di dato entre organizacion (Jeremy Erasmus).
Ta sigui dia 11 di November for di 9:30 am te cu 5:00 pm cu sesion y workshop. Un dia cu workshop y discusion. Topico ta inclui Wikidata, competencia di dato, dato electoral, historia di famia, implementacion di Ciencia Habri den bo organizacion, y feedback riba e training di DCDC-Network.
Dia 12 di November for di 9:30 am te cu 3:30 pm, tin sesion y workshop. E ta continuacion di workshop y discusion, y actividad practico.
E conferencia lo informa kico e Network lo enfoca riba dje den futuro!
