Minister di Husticia Arthur Dowers:
ORANJESTAD (AAN)- Minister Arthur Dowers, a sigui elabora tocante e hobennan cu ta cay den delincuencia aki na Aruba unda tin di nan ta bay cera, y despues cu nan haya nan libertad, ta reincidi den mesun delito y tin cu bay cera bek. Esaki ta algo cu mandatario ta lamenta hopi mes.
E dignatario a señala por ehemplo, cu e mucha ta wordo controla na Wit Gele Kruis ora e ta nace, e ta bin tuma su angua, y tin caso cu despues e mucha ta mira su mama ta droga, of e tata ta bati e mama, y e cosnan aki por wordo señala, y den e cuadro, por ehemplo, di Cas di Siguridad, por trece dilanti cu esaki ta un factor di riesgo, pasobra no ta tur mucha ta nace den un cas cu problema, of cu un pober ta bira criminal.
E mandatario a bay bek na e patronchi y a señala cu tin suficiente indicacion cu esey ta e rumbo cu e mucha ta bay.
“Tin tambe cierto generacionnan den cierto areanan cu ta, por ehemplo, den bendemento di droga, posesion di arma, etc., unda e hendenan ta bay hunto cu otro, y tambe nos mester instrumentonan diferente na esun cu nos tin te aworaki pa por interveni den e sistemanan ey”, Minister Dowers a relata.
El a menciona un instrumento importante cu gobierno a bin cu ne, y cu a haya critica tempo atras, cual ta e “Leerplicht”. Esaki ta un instrumento cu por a controla tambe den e famianan y por a forza e muchanan bay scol.
“Mi ta kere cu nos tin instrumentonan pa bo traha cu ne, falta algun cos, y nos no mester lubida cu tin hopi hende ta trahando tambe, haciendo esfuerzo, y no ta tur ora ta unda cu nos kier, pero tin diferente organizacion ta trahando, logrando, y tin caminda bo ta bisa, mescos cu na hopi caminda na mundo, bo no ta logra. Recientemente, nos a bin cu e enkelband pa hoben, y nos a mira cu esey tambe ta duna cierto control riba muchanan cu ta comete crimen, y esey ta un proyecto piloto cu nos lo evalua dentro di poco, mira con e resultadonan ta”, Minister di Husticia, Arthur Dowers a señala.
Segun e mandatario tin diferente cos ta pasando na mesun momento y logicamente ora cu e hobennan comete crimen, Ministerio Publico y Polis ta actua pa percura pone nan tras di trali, y lamentablemente, esey ta tuma lugar tambe.
Minister Dowers a remarca cu e instrumentonan cu Husticia tin pa detecta arma di candela ilegal ta: informacion: e tip-line pa sa unda tin arma, e ‘preventieve fouilleren’ cual ta duna su resultadonan, control di polis den cierto areanan, control di trafico unda ta haya arma y droga. “Kiermen nos ta haciendo tur e pasonan cu nos por haci, loke si nos mester tene cuenta cu ne ta cu nos tin hopi menos cu nos tabata tin na 2017 na polis (80 polis menos)”, Minister Dowers a subraya.
