Durante Vierlandenoverleg a papia riba fondo special pa documenta historia di e parti Caribense di Reino

Minister Xiomara Maduro:

ORANJESTAD (AAN): Durante e conferencia di prensa di Gobierno di tur Dialuna, minister di Finanzas y Cultura Xiomara Maduro a papia riba su viahe reciente pa Hulanda.

E mandatario a splica cu e viahe na comienzo di e luna aki tabata relaciona cu e asina yama ‘Vierlandenoverleg’ cu tabata tin riba tereno di Cultura.

“Sigur e reunionnan aki tabata fructifero, pasobra esaki ta un foro caminda e ministernan di Cultura di Reino ta topa otro pa asina tuma decisionnan”.

E biaha aki tabata tin riba agenda locual ta bira e trabaonan  cu a wordo haci caba pa e gruponan di trabao, cu ta encera entre otro pa por institui un fondo pa Cultura, segun Maduro, kende a indica cu esaki a wordo presidi pa e grupo di Aruba, cu a lidera e trabaonan aki.

E minister a sigui bisa cu e fondonan di Cultura ta pa por haci documentacion sigur pa e paisnan Caribense den Reino.

“Mester bisa cu tin fondonan existente manera UNOCA di Aruba y Mondriaan di Reino, pero esun aki ta un fondo special pa por documenta e historia di e parti Caribense di Reino”.

E fondo aki ta uno special y ta wordo yama Bon Bini, pasobra sigur na nos pais tin mester di mas documentacion pa locual ta nos historia  y pa e historia aki keda conoci dentro di Reino y pafo di Reino, pero specialmente pa nos mes, segun Maduro.

Un otro topico riba cual a papia durante e Vierlandenoverleg ta e educacion cultural.

Segun Maduro, educacion cultural tambe ta wordo lidera for di Aruba.

El a splica cu ya caba a tuma lugar un ‘kickoff meeting’ cu a tuma lugar dos siman pasa riba e topico aki.

“Aruba ta trahando, pa asina e parti di historia di nos cultura tambe wordo poni den e curriculo den enseñanza”.

Algo cu sigur pa hopi tempo tabata wordo pidi y aworaki sigur ta bay wordo concretiza, segun e mandatario.

El a papia tambe di otro puntonan cu a wordo trata den e reunion entre e 4 paisnan di Reino, incluyendo herencia cultural intangible, cu ta wordo lidera pa St. Maarten.

Pa Aruba un bon ehempel di cultura intangible ta nos Dande.

E minister a indica cu ta importante pues pa nos Dande tambe wordo documenta.

Na final di tur cos un acuerdo a wordo firma pa e trabaonan sigui.