Publicacionnan mundial ta confirma informacionnan serio di DIARIO --- *Topico den Parlamento ta keda basa riba ganashi politico den eleccion --- *E sobrevivencia di Aruba den un crisis mas mester haya preferencia
ORANJESTAD(AAN)—E problemanan mundial serio ta e topico di e mayoria di Arubiano, cu ta conciente cu Aruba y henter mundo ta confronta un situacion sumamente serio mientras e crisis di Ukraine ta continua.
E preocupacion di Pueblo di Aruba tin su base den desaroyonan mundial cu ya ta afecta bida na Aruba seriamente.
E costo di bida di Aruba ta sigui subi a base di e costo di produccion di tur loke hende mester pa biba rond mundo.
Ayera publicacionnan internacional a confirma e informacionnan di edicion di ayera di DIARIO.
Na Hulanda, Pueblo ta wordo informa di e realidad di costo di bida cu a subi cu 7 porciento, pues ta confirma e problema serio di Pueblo Hulandes cu DIARIO a presenta ayera.
Na Merca, costo di bida a sigui subi. Informacionnan cu DIARIO a presenta di e Fondo Monetario Internacional ayera tabata base pa noticia internacional cu ta mustra riba e preocupacion serio cu e situacion mundial ta causa na tur cas di famia cu mester cumpra menos cu mas placa.
Mundo ta den un crisis, loke sigur no ta topico den loke mester ta e centro di atencion politico na Aruba, cu ta Parlamento.
Ora tuma nota di preguntanan cu ta wordo haci dor di miembronan di oposicion, e pregunta ta surgi si nan ta realisa kico a bati na porta di Aruba.
Confusion pisa ta wordo causa riba terenonan cu ta mishi directamente cu Pueblo di Aruba, manera costo di cuido medico y AZV.
Pueblo ta wordo hinca den angustia cu informacion robez riba aumento di costo di AZV den weganan politico, cu awe ta causa solamente mas consternacion cerca e Pueblo.
Democracia ta exigi pa awe Parlamento ta centro di trabou dirigi riba bienestar di Aruba y no por ta un lugar di encuentro pa acumula voto pa un proximo eleccion pa un Aruba, cu como parti di mundo ta den un situacion serio.
Kico e crisis di Ukraine lo nifica finalmente pa mundo? Aki nos no ta papia di bomnan cu por cay. Nos no ta papia di arma nuclear.
Awe ta momento pa Aruba uni den un situacion sumamente serio, den cual tur loke a wordo construi pa tanto tempo, ta basha abou.
Paisnan grandi ta busca alternativanan economico pa mantene e nivel di bida di nan ciudadano.
Rapportnan oficial internacional ta mustra cu Aruba ta riba e bon caminda pa economisa, pa baha debe y pa habri un caminda nobo di responsabilidad.
Parlamento di un pais tin e prome responsabilidad pa bienestar di e pais, cu no por wordo mara na votonan cu partidonan politico kier acumula diariamente ora nan haci uzo di nan posicion como Miembro di Parlamento di Aruba.
E nivel politico no por keda rehen na un atake constante di loke Gobierno y cu den e crisis actual ta mas cu obvio.
Aruba ta cana cu un pakete pisa di e pasado den cual a spart placa di Aruba pero tambe e pakete den un mundo sumamente dificil den cual costo di bida ta subi manera fli.
E resultado ta pa Pueblo di Aruba cu awe mester wordo sirbi dor di un Parlamento, cu no ta mira cuanto voto tin na horizonte pero ta mira e necesidad grandi di cada Arubiano, cada uno cu nan pakete di preocupacion den un mundo cu un horizonte, cu cada rato ta bira mas scur!
