ORANJESTAD (AAN): Kico por spera ta bay sosode awe diasabra y mañan diadomingo durante e 'Vacunathon'?
Chris Goedhart, lider operacional di e campaña di vacunacion a splica cu na prome lugar ta bay tin un 'triage'.
Ta bay check si en berdad e persona ta un persona cu por haya e vacuna y si ta bin na remarca. Diferente pregunta lo wordo haci. Tambe ta bay tin preguntanan medico riba e carchi di registracion.
Ta bay tin docternan presenta pa yuda cu cualkier pregunta cu e persona por tin. Ta bay haya ayudo di docternan di cas y ta bay publica e lista di cual docter di cas ta bay yuda e dianan aki, Goedhart a detaya.
Esnan cu ainda tin duda pa wordo vacuna por acudi na e centro di vacunacion pa haci preguntanan medico, a bisa.
Mirando cu ta den pandemia ainda ta importante pa acudi cu 'tapaboca' y esey ta obligatorio paden di e localidad. Tambe ta pidi tur hende pa mantene e distancia di 1,5 meter di distancia fisico durante henter e proceso di vacunacion.
E lider operacional di e programa di vacunacion a agrega cu si un persona ta malo, por fabor keda cas.
Despues di e 'triage' cu ta bay tuma lugar na e priklocatie ta bay tin un proceso di registracion. Toch kier pidi pueblo ainda pa registra via e Aruba Health App of via e website di DVG ya cu esey ta bay haci e proceso hopi mas facil di registracion na e priklocatie mes y asina por maneha mas facil e fluho di hende, a splica.
Si bo no logra registra online, no ta problema. Bo por yega sin registra.
Despues di haya e prik ta bay pidi tur hende pa warda 15 minuut sinta riba stul pasobra eynan ta drenta den e fase di observacion y ta bay tin docternan presenta pa wak si tin algun reaccion cu por tuma lugar despues di haya e vacuna.
Los di e personal cu diariamente tey pa atende e parti logistico y medico, ta bay tin amplitud di e personal administrativo y medico pa yuda pa por vacuna mas hende posibel, a enfatisa.
