ORANJESTAD (AAN): Ronella Croes, CEO di Oficina di Turismo a laga sa cu ta trahando riba un maneho nacional pa asina wak cual ta bay ta e protocolnan na cual e
bishitantenan cu ta vacuna lo mester atene nan mes na dje.
El a bisa cu lo por tin puntonan diferencial y esey no kiermen cu Aruba no ta habri pa esnan cu no ta vacuna. Pero e rekisitonan, por ehempel, di entrada por ta diferente pa esnan cu a vacuna y esakinan por ta mas suave.
A menciona cu por ehempel, esnan cu a vacuna no mester test como rekisito di entrada pa por realisa un viahe pa Aruba.
Esaki ta pensamentonan preliminar, pero ta algo cu ta trahando riba dje, a splica.
Pa por yega na suavisa esaki pa e bishitantenan mester vacuna e populacion di Aruba mas ainda y sigur e grupo di risico.
E pensamento ta mas cu entre mas protegi e mesun comunidad di Aruba ta mas por suavisa tambe e rekisitonan di entrada pa e bishitantenan y mas por stimula e recuperacion turistico y economico, Ronella Croes a indica.
"Ta na abo e ora ey pa participa na e solucion y duna oido na esaki pasobra ta den bo man, cu hunto nos por logra cu nos por recupera pa rapido cu ta posibel y asina yega na un biba mas normal pa nos cada un tambe, Croes a finalisa bisando.
