Durante e Siman di Salud a trata e tema Fortaleza Mental

Meneer Nathan Nicolaas, docente di Movecion y Salud:

• A enfoca na fortalece e capacidad mental di e alumnonan 

ORANJESTAD (AAN) E Docente di Movecion y Salud na St. Franciscus College, meneer Nathan Nicolaas, a relata den entrevista cu DIARIO, cu door cu e Siman di Salud tabata tin como tema “Fortaleza Mental”, nan a enfoca riba diferente aspecto cu ta yuda e muchanan fortalece nan capacidad mental.

“Temanan manera drumi trempan, come saludabel, bebe awa, y stimula nan den movecion pero tambe den diferente area cu ta yuda nan capacidad mental tambe”, meneer Nicolaas a señala.

   El a bisa tambe cu deporte ta un di e hermentnan mas poderoso cu tin pa pone e muchanan den nan capacidad mental y tambe social, pero tambe move  nan curpa pa ta saludabel.

   “Mi tin cu bisa cu muchanan cu ta haci deporte bo ta wak nan na nan comportacion, den nan habilidad social, kiermen e ta duna un aporte masha grandi mes na e desaroyo di e mucha, y mi ta kere eynan tin e poder di e deporte. Mi ta desea pa hopi mas mucha por acudi na un club y bira miembro pa nan por participa y engrandece e mundo di deporte na Aruba”, meneer Nicolaas a señala.

   Meneer Nicolaas a comenta cu su tarea durante e aña escolar ta duna les cu un base hopi amplio tocante diferente movecion y deporte, tambe e ta bay den klas duna les di salu, por ehemplo salud mental, come saludabel, drumi na ora, y tur e aspectonan di salud. Tambe nan ta zorg pa den pause tin suficiente material pa e alumnonan por haci deporte sano, y asina ta purba pa nan move mas tanto posibel durante henter e aña.

   Pa loke ta mayornan, ora e muchanan ta den cas, Meneer Nicolas a expresa cu e sa cu no ta facil, pasobra nan tin yen di cos pa haci, pero e ta kere cu si nan yuda nan muchanan cu deporte, despues nan mes ta yuda pa tene cas limpi, cu comportacion, y si por pone e muchanan unda nan lo haya mas disciplina, costumber cu regla, e ta costa un poco esfuezo pero e ta yuda den e formacion di e mucha.