E ta parti di nos identidad Arubano
ORANJESTAD (AAN): Algun decada pasa, ta hopi mucha bo ta haya cu nan mayornan na barancanan di Malmok ta purba gara masbango. Tambe tabatin hopi mucha ta purba di pisca na e pida bieu di waf (pariba di unda ta Bushiri), y e tabata un pasatempo faborito di muchanan di Madiki.
E interes tin di wordo treci bek. Pesey mes Gobierno a dicidi cu pa sigui fortalece e comunidad di pesca, nan a renoba pier di Savaneta (ex-Brisas) y actualmente e destaho publico pa e pier na Rodger’s Beach ta habri.
Ta importante pa e cultura aki keda biba den e generacionnan cu ta sigui nos. DIARIO a compronde cu pa esaki, algo special ta na caminda. Pueblo tin di keda pendiente pa e lansamento di un plan yama “Programa Piskechi”.
E ta un iniciativa dedica na inspira y conecta nos hoben cu nos tradicion di piscamento. Nos ta inverti den futuro, sin lubida di unda nos ta bin.
