Durante e parti di formacion bo ta bay wak ken bo ta como persona

ORANJESTAD(AN): E trayecto di Formacion Social pa hende muher hoben ta bay cuminza na Augustus

y pesey durante un conferencia di prensa Diahuebs, Sergeant Rayron Thiel a duna un splicacion riba e parti militar di e programa.

“Nos tin un programa di 4 luna traha y structura unda cu nan ta bay siña domina formacion general den nan bida personal”.

Tambe nan ta bay participa na e parti cu yama ‘bivak’, unda cu nan lo bay den mondi, unda cu nos lo haci uso di e parti di naturaleza di Aruba, segun Thiel.

El a sigui bisa cu na dado momento e participantenan ta bay siña move y orienta riba e tereno, cu ayudo di un compas.

Un otro parti cu ta bay traha riba dje ta tambe e habilidad fisico.

“E parti fisico ta pisa pero no imposibel, mientras cu e participantenan lo haya tambe un curso di EHBO”, segun Thiel, kende a indica cu Rode Kruis ta yuda tambe cu esey.

El a splica cu importante den e 4 lunanan ta tambe e momentonan cu ta bay forma.

“Esey no ta facil”.

E momento ey ta e momento cu bo ta bay wak ken bo ta como persona.

E ta pa yuda forma abo como persona y yudabo segun e manera militar, pero nos tey pa yudabo.

Na final bo lo bisa mi ta un persona integro, mi ta trata hende cu respet y mi lo percura cu na trabao tin un bon ambiente y safe, segun Thiel.

El a bisa tambe cu hopi cu a participa na e prome fase aki di 4 luna a gusta asina tanto, cu nan ta pidi te hasta pa hacie atrobe.

Sergeant Leito tambe a hiba palabra durante e conferencia di prensa y como hende muher el a haci un invitacion na tur hende muher hoben pa nan aplica pa e programa di Formacion Social.

El a splica cu inscripcion ta habri ainda te cu fin di Mei.

E exigencianan di edad ta di 18 pa 24 aña, mientras cu e fecha cu lo cuminza cu e trayecto ta 23 di Augustus.

Leito a menciona tambe cu e cuponan ta limita y cu por comunica via e number di telefon 522-5352 of por manda un email na This email address is being protected from spambots. You need JavaScript enabled to view it..